काठमाडौं,२० वैशाख । पहलगाममा भएको आतङ्कवादी आक्रमणपछि भारत र पाकिस्तानबीचको सम्बन्ध थप तिक्त बन्दै गएको छ। यसैबीच, पाकिस्तानका रक्षामन्त्री ख्वाजा आसिफले भारतविरुद्ध कडा चेतावनी दिएका छन्।
पाकिस्तानी सञ्चारमाध्यम जियो न्यूजका अनुसार, रक्षामन्त्री आसिफले यदि भारतले सिन्धु जल सम्झौताको उल्लंघन गर्दै सिन्धु नदीमा बाँध निर्माण गर्ने प्रयास गर्यो भने पाकिस्तानले आक्रमणको विकल्प रोज्ने बताएका छन्।
यससँगै, भारतीय सेनाले मे २ गते राति जम्मू–कश्मीरको कुपवाडा, उरी र अखनूर क्षेत्रमा पाकिस्तानी सेनाले नियन्त्रण रेखा (LoC) पार गर्दै गोलीबारी गरेको आरोप लगाएको छ। दुबै देशबीच नवौँ दिनदेखि सिमाना आसपास लगातार गोलीबारी भइरहेको छ।
सामाजिक सञ्जालको क्षेत्र पनि द्वन्द्वबाट अछुतो छैन। पाकिस्तानका सूचना तथा प्रसारण मन्त्री अताउल्लाह तरारको एक्स (पूर्व ट्विटर) खाता भारतमा ब्लक गरिएको छ। केही दिन अघि उनले पाकिस्तानमाथि भारतबाट आक्रमण भएको दाबी गरेका थिए।
यसअघि भारतले पाकिस्तानी प्रधानमन्त्री शहबाज शरिफको युट्युब र इन्स्टाग्राम खाता पनि ब्लक गरिसकेको छ।
तनावको यो अवस्था अप्रिल २२ मा पहलगामको बैसरन उपत्यकामा भएको आतङ्कवादी आक्रमणपछि चर्किएको हो, जसमा २६ जना पर्यटकको ज्यान गएको थियो।
