काठमाडौं,२५ वैशाख । गत राति चेन्नई सुपर किंग्ससँगको रोमाञ्चक खेलमा दुई विकेटले पराजित भएपछि कोलकाता नाइट राइडर्स (KKR) को यस सिजनको आईपीएल यात्रा लगभग समाप्त भएको छ। अंकतालिकामा छैटौँ स्थानमा रहेको कोलकताका लागि गणितीय रूपमा प्लेअफ पुग्ने संभावना बाँकी भए पनि व्यवहारमा त्यो अब अत्यन्तै कठिन देखिन्छ।
इडेन गार्डेनमा आयोजित खेलमा कोलकाताले पहिले ब्याटिङ गर्दै ६ विकेटको क्षतिमा १७९ रनको चुनौतीपूर्ण योगफल प्रस्तुत गरेको थियो। कप्तान अजिंक्य रहाणेले सर्वाधिक ४८ रन जोडे भने आन्द्रे रसेलले २१ बलमा ३८ रनको आक्रमक इनिङ्स खेले। मनिस पाण्डे २६ रनमा अविजित रहे। चेन्नईका लागि नुर अहमद चम्किए, जसले चार ओभरमा ३१ रन खर्चिँदै चार विकेट झारे।
जवाफमा चेन्नईले सुरुवातमा ६० रनमै पाँच विकेट गुमाएर संकटमा परेको थियो। तर, डेवाल्ड ब्रेभिसले २५ बलमा विस्फोटक ५१ रन प्रहार गर्दै टोलीलाई खेलमा फर्काए। उर्भिल पटेलले ११ बलमा ३१ रन र शिवं दुबेले ४५ रन बनाएपछि चेन्नईले अन्ततः दुई बल बाँकी छँदा ८ विकेटको क्षतिमा १८३ रन बनाउँदै जित दर्ता गर्यो।
कोलकाताका लागि बलिङतर्फ वैभव आरोहाले तीन विकेट लिए पनि महँगो सावित भए — उनले तीन ओभरमा ४८ रन खर्चिए। वरुण चक्रवर्तीले भने चार ओभरमा १८ रन खर्ची दुई विकेट लिएर सन्तुलित प्रदर्शन गरे।
१२ खेलबाट ११ अंकसहित छैटौँ स्थानमा रहेको कोलकाताले बाँकी खेलहरू जिते पनि अन्य नतिजाहरू अनुकूल नआएमा उनीहरूको प्लेअफ यात्रा यहीं टुंगिन सक्छ। यसअघि नै प्रतियोगिताबाट बाहिरिएको चेन्नई ६ अंकसहित तालिकाको पुछारमा छ।
