काठमाडौं,२५ वैशाख । भारतीय क्रिकेटका धुरन्धर ओपनर तथा कप्तान रोहित शर्माले अन्ततः टेस्ट क्रिकेटबाट संन्यास लिएका छन्। ३८ वर्षीय रोहितले बुधबार सामाजिक सञ्जालमार्फत यो निर्णय सार्वजनिक गर्दै टेस्ट क्रिकेटमा भारतको प्रतिनिधित्व गर्नु गौरवको विषय रहेको उल्लेख गरेका छन्।
रोहितको संन्यास भारतको आगामी इंग्ल्यान्ड भ्रमणको ठीकअघि आएको हो। पाँच टेस्टको श्रृंखलाका लागि अब भारतले नयाँ कप्तान चयन गर्नुपर्नेछ। यद्यपि रोहित एकदिवसीय क्रिकेट खेलिरहनेछन्।
रोहितले सन् २०१३ मा वेस्ट इन्डिजविरुद्ध टेस्ट डेब्यू गरेका थिए। उनले ६७ टेस्ट खेल्दै ४,३०१ रन बनाएका छन्, जसमा १२ शतक समावेश छन्। उनको टेस्ट क्रिकेटको सर्वोच्च स्कोर २१२ रन हो, जुन उनले २०१९ मा दक्षिण अफ्रिकाविरुद्ध बनाएका थिए। ४६.५४ को औसतले रन बनाएका रोहित प्रारम्भमा मध्यक्रमका ब्याट्सम्यान थिए तर पछि ओपनरको भूमिकामा सफलतापूर्वक परिवर्तन गरे।
गत वर्ष अस्ट्रेलियाविरुद्ध मेलबर्नमा खेलेको अन्तिम टेस्ट खेलपछि रोहितको फर्ममा गिरावट आएको थियो। पाँच इनिङ्समा ३१ रन मात्र बनाएका उनले त्यसपछि सिड्नी टेस्ट खेल्न पाएनन्। भारतले त्यो श्रृंखला २–१ ले गुमायो, जसले रोहितको आलोचना थपियो र उनलाई टेस्ट क्रिकेटबाट विदा लिन दवाब बढेको देखियो।
रोहित यसअघि टी–२० क्रिकेटबाट पनि संन्यास लिइसकेका छन्। उनले गत वर्षको विश्वकप जितेपछि विराट कोहलीसँगै टी–२० क्रिकेट छोड्ने घोषणा गरेका थिए। एकदिवसीयमा भने उनले आफ्नो यात्रालाई निरन्तरता दिने बताएका छन्।
