काठमाडाैं,०६ जेठ । आईसीसी महिला टी–२० विश्वकप एशिया छनोट अन्तर्गत ‘सुपर थ्री’ चरणको अन्तिम खेलमा नेपाल महिला क्रिकेट टोली घरेलु टोली थाइल्यान्डसँग ७८ रनले पराजित हुँदै प्रतियोगिताको उपविजेतामा सीमित भएको छ। यो जितसँगै थाइल्यान्डले अपराजित यात्रा कायम राख्दै उपाधि उचालेको छ।
टेर्डथाई क्रिकेट मैदानमा टस हारेर पहिले ब्याटिङ गरेको थाइल्यान्डले निर्धारित २० ओभरमा २ विकेटको क्षतिमा १५८ रन बनायो। थाइल्यान्डकी नाट्या बोचाथम र नन्नापट कोन्चारोन्काईले अर्धशतक प्रहार गर्दै टोलीलाई बलियो अवस्थामा पुर्याए। नेपालको तर्फबाट राजमती ऐरी र मनिषा उपाध्यायले समान १–१ विकेट लिइन्।
१५९ रनको चुनौतीपूर्ण लक्ष्य पछ्याउने क्रममा नेपालको ब्याटिङ लाइनअप थाइल्यान्डको सशक्त बलिङ सामु धराशायी भयो। कविता कुँवरले २४ रनको योगदान दिँदै सर्वाधिक रन बनाइन्। थाइल्यान्डकी ओनिचा कम्चोम्फुले घातक प्रदर्शन गर्दै ह्याट्रिक सहित ४ विकेट लिएर नेपालको पारीलाई ८० रनमै सीमित गरिन्।
यद्यपि, यो हारको बाबजुद नेपाल र थाइल्यान्ड दुवै टोलीले यसअघि नै एशिया क्षेत्रको प्रतिनिधित्व गर्दै आईसीसी महिला टी–२० विश्वकप ग्लोबल छनोटका लागि स्थान पक्का गरिसकेका छन्। उक्त छनोट प्रतियोगितामा १० टोली सहभागी हुनेछन्, जसबाट शीर्ष ४ टोलीले सन् २०२६ मा इङ्ग्ल्यान्डमा आयोजना हुने महिला टी–२० विश्वकपमा स्थान बनाउनेछ।
