काठमाडौं,१९ जेठ । इन्डियन प्रिमियर लिग (आईपीएल) २०२५ को क्वालिफायर-२ मा पञ्जाब किंग्सले मुम्बई इन्डियन्सलाई ५ विकेटले पराजित गर्दै ११ वर्षपछि आईपीएलको फाइनल यात्रा तय गरेको छ। अब पञ्जाब किंग्सले उपाधिका लागि रोयल च्यालेन्जर्स बेंगलुरु (आरसीबी) सँग फाइनल भिडन्त गर्नेछ।
पञ्जाबले यसअघि सन् २०१४ मा पहिलोपटक फाइनल खेलेको थियो तर उपाधि जित्न असफल भएको थियो। यो दोस्रो अवसरमा टोलीले इतिहास रच्ने लक्ष्यसहित फाइनलमा उपस्थिति जनाएको हो।
नरेन्द्र मोदी स्टेडियम, अहमदाबादमा आइतबार सम्पन्न खेलमा मुम्बई इन्डियन्सले २०३ रनको विशाल लक्ष्य प्रस्तुत गरेको थियो, जुन पञ्जाबले १९ ओभरमै ५ विकेट गुमाउँदै पूरा गर्यो।
पञ्जाबको जितका नायक बने कप्तान श्रेयस अय्यर, जसले ४१ बलमा अविजित ८७ रनको विस्फोटक पारी खेले। उनको इनिङमा ५ चौका र ८ छक्का समावेश थिए। अय्यरले अन्तिम ओभरमा छक्का प्रहार गर्दै टोलीलाई विजयी बनाएका थिए। उत्कृष्ट प्रदर्शनका लागि उनलाई ‘प्लेयर अफ द म्याच’ घोषित गरियो।
पञ्जाबका लागि नेहल वढेराले ४८ रन तथा जोश इंग्लिसले ३८ रनको महत्वपूर्ण योगदान गरे।
यसअघि, टस हारेर पहिले ब्याटिङ गरेको मुम्बई इन्डियन्सले तिलक वर्मा, सूर्यकुमार यादव र जोनी बेयरस्टोको योगदानमा २०३ रन बनाएको थियो। वर्मा र सूर्यकुमारले समान ४४ रन, भने बेयरस्टोले ३८ रन बनाए।
पञ्जाबका बलर अजमतुल्लाह ओमरजईले २ विकेट लिए भने मुम्बईका लागि अश्विनी कुमारले २ विकेट झारे।
अब पञ्जाब किंग्सले मंगलबार आइपीएल २०२५ को फाइनल खेलमा आरसीबीसँग प्रतिस्पर्धा गर्नेछ। दुवै टोली उपाधिका लागि धेरै वर्षदेखि संघर्षरत छन्, जसले गर्दा यो फाइनल खेल थप रोमाञ्चक हुने अपेक्षा गरिएको छ।
