काठमाडौं,१९ असोज । दसैँ बिदापछि पुनः सुरु भएको सुनचाँदी कारोबार आइतबारदेखि चर्को मूल्य वृद्धि सहित खुलेको छ। लगातारको बढ्दो अन्तर्राष्ट्रिय मूल्य र बजारमा बढ्दो चापका कारण नेपालमा पनि सुनचाँदीको मूल्य ऐतिहासिक उच्चतिर पुगेको छ।
नेपाल सुनचाँदी व्यवसायी महासंघका अनुसार आइतबार (असोज १९) को लागि छापावाल सुनको मूल्य तोलामा २ लाख ३० हजार ६०० रुपैयाँ निर्धारण गरिएको छ। यो अहिलेसम्मकै सबैभन्दा उच्च दर हो। दसैँअघि अन्तिम मूल्य निर्धारण (असोज १२) का दिन सुनको भाउ २ लाख २३ हजार २०० रुपैयाँ थियो, जसको तुलनामा तोलामा ७ हजार ४०० रुपैयाँले वृद्धि भएको हो।
त्यस्तै, चाँदीको मूल्य पनि उक्लिँदै ऐतिहासिक स्तरमा पुगेको छ। असोज १२ मा तोलाको २ हजार ८१० रुपैयाँ रहेको चाँदी आइतबार २ हजार ९३० रुपैयाँ मा कारोबार भएको छ।
विश्लेषकहरूको भनाइमा, अन्तर्राष्ट्रिय बजारमा बढ्दो सुनको दर, अमेरिकी डलरको कमजोरी र भू–राजनीतिक अनिश्चितताले स्थानीय बजारमा पनि प्रत्यक्ष असर पारेको हो। उनीहरूका अनुसार निकट भविष्यमा सुनचाँदीको मूल्यमा थप वृद्धि हुन सक्ने अनुमान गरिएको छ।
