काठमाडौं,२१ असोज । नेपालको सुनचाँदी बजारमा एकपटक फेरि ऐतिहासिक उथलपुथल आएको छ । मंगलबार नेपाल सुनचाँदी व्यवसायी महासंघले सुनको मूल्यमा एकैदिन तोलाको २,३०० रुपैयाँको कीर्तिमानी वृद्धि घोषणा गरेको छ।
यस वृद्धिसँगै, छापावाल सुनको मूल्य प्रतितोला २ लाख ३५ हजार ४ सय रुपैयाँ कायम भएको छ । यो नेपालको इतिहासमा सुनको हालसम्मकै उच्च मूल्य हो । सोमबार सुनको मूल्य प्रतितोला २ लाख ३३ हजार १ सय रुपैयाँ रहेको थियो। तर, अन्तर्राष्ट्रिय बजारको प्रभावले गर्दा नेपाली बजारमा सुनको भाउ दिनदिनै नयाँ रेकर्ड बनाइरहेको छ ।
चाँदीको मूल्यमा भने मंगलबार वृद्धि नभए पनि यो पनि इतिहासकै उच्च बिन्दुमा कायम छ । महासंघका अनुसार, चाँदी प्रतितोला २ हजार ९६० रुपैयाँ मा कारोबार भइरहेको छ । सुन र चाँदी दुवैको मूल्यले लगातार नयाँ कीर्तिमान बनाउँदा, लगानीकर्ता र उपभोक्ता दुवैमा यसको असर स्पष्ट देखिएको छ। सुनको भाउ कहिलेसम्म यो उचाइमा रहला, त्यो हेर्न बाँकी नै छ।
