काठमाडाैं,१८ कातिक । बंगलादेशकी ८० वर्षीया पूर्वप्रधानमन्त्री तथा बंगलादेश नेसनलिस्ट पार्टी (बीएनपी) की नेतृ खालिदा जियाले आगामी फेब्रुअरीमा हुने आम निर्वाचनमा प्रतिस्पर्धा गर्ने घोषणा गरेकी छन्। बीएनपीका वरिष्ठ नेता मिर्जा फखरुल इस्लाम आलमगिरका अनुसार जियाले देशका तीन निर्वाचन क्षेत्रबाट उम्मेदवारी दिने तयारी गरेकी हुन्।
लामो समयदेखि बंगलादेशको राजनीतिक केन्द्रमा रहने खालिदा जियाको स्वास्थ्य अहिले कमजोर भए पनि पार्टीभित्र उनलाई नेतृत्वको प्रतीकका रूपमा हेरिएको छ। उनी सन् २०२४ को अगस्टमा भएको जनविद्रोहपछि सत्ताच्युत भएकी थिइन्। त्यसअघि, प्रमुख प्रतिद्वन्द्वी शेख हसिनाको सरकारले सन् २०१८ मा भ्रष्टाचारको मुद्दामा उनलाई जेल चलान गरेको थियो। हसिनालाई सत्ताच्युत गरिएपछि जिया गत वर्ष मात्र रिहा भएकी थिइन्।
बीएनपीका अर्का शीर्ष नेता तारिक रहमान (तारिक जिया) पनि अहिले पार्टीको प्रमुख रणनीतिक भूमिकामा रहेका छन्। सन् २००४ मा तत्कालीन प्रधानमन्त्री शेख हसिनाको र्यालीमा भएको ग्रिनेड आक्रमणको घटनामा उनलाई अनुपस्थित अवस्थामै आजीवन कारावासको सजाय सुनाइएको थियो। ५९ वर्षीय तारिक सन् २००८ देखि बेलायतमा निर्वासनमा रहेका छन्। हसिनाको पतनपछि उनीमाथि लागेको आरोप हटाइएको छ।
बंगलादेशको राजनीतिमा दशौं वर्षदेखि शेख हसिना र खालिदा जियाबीचको प्रतिस्पर्धा नै मुख्य विषय रहँदै आएको छ। यो प्रतिस्पर्धालाई राजनीतिक वृत्तमा ‘ब्याटल अफ द बेगम्स’ भनेर चिनिन्छ।
यो संघर्षको जड सन् १९७५ मा देखिन्छ, जब शेख हसिनाका पिता तथा स्वतन्त्रता नेता शेख मुजिबुर रहमानको सैनिक ‘कू’ मा हत्या भयो। त्यसको तीन महिनापछि तत्कालीन उपसेनाप्रमुख र खालिदा जियाका पति जियाउर रहमानले सत्ता हातमा लिए र पछि सन् १९७७ मा राष्ट्रपति बने। उनलाई पनि सन् १९८१ मा हत्या गरिएको थियो।
त्यसपछि, ३५ वर्षकी उमेरमा दुई सन्तानकी आमा खालिदा जियाले बीएनपीको नेतृत्व समालिन्। सिकारु नेताबाट देशको प्रधानमन्त्रीसम्मको यात्रा तय गर्दै उनले हसिनाको शक्तिशाली प्रतिद्वन्द्वीका रूपमा आफूलाई स्थापित गरिन्। सन् १९९० मा उनले शेख हसिनासँगै मिलेर तत्कालीन सैनिक तानाशाह हुसेन मुहम्मद इर्सादविरुद्ध आन्दोलनको नेतृत्व गरेकी थिइन्, जसपछि इर्साद सत्ताच्युत भए।
त्यसपछि डेढ दशकसम्म बंगलादेशको सत्ता यी दुई नेतृबीच पालैपालो घुमिरह्यो। अहिले फेरि खालिदा जियाको उम्मेदवारीले बंगलादेशी राजनीतिमा नयाँ अध्यायको संकेत दिएको विश्लेषण भइरहेको छ।
