काठमाडाैं,३० कातिक । बिहार विधानसभा चुनावको नतिजा सार्वजनिक भएसँगै राज्यमा सत्ता पुनर्संरचना प्रक्रिया तीव्र भएको छ। मुख्यमन्त्री नीतीश कुमारले पुरानो विधानसभा विघटनको सिफारिस गर्दै नयाँ विधानसभाका लागि बाटो तयार पार्ने तयारी अन्तिम चरणमा पुगेको स्रोतहरूले बताएका छन्।
भारतीय निर्वाचन आयोगले आजै बिहारका राज्यपाललाई १८औँ विधानसभासम्बन्धी औपचारिक परिणाम पेश गर्ने कार्यक्रम राखेको छ। यसलाई आधार बनाएर राज्य सरकार गठनको औपचारिक प्रक्रिया सुरु हुने अपेक्षा गरिएको छ।
सोमबार मुख्यमन्त्रीको नेतृत्वमा बस्ने मन्त्रिपरिषद् बैठकले १७औँ विधानसभा विघटनको प्रस्ताव अनुमोदन गर्नेछ। बैठकपछि नीतीश कुमारले राज्यपालसमक्ष आफ्नो राजीनामा बुझाउने तयारी गरेका छन्।
राजीनामापछि सत्तारूढ एनडीए गठबन्धनले सबै घटक दलका प्रतिनिधिहरूको बैठक बोलाउनेछ। बैठकमा गठबन्धनको नयाँ नेता चयन गरिनेछ, जसले आगामी मुख्यमन्त्रीको जिम्मेवारी सम्हाल्नेछन्।
नेता चयनपछि राज्यपाललाई औपचारिक सिफारिस पठाइने र नयाँ सरकार गठन प्रक्रिया सुरु हुने जनाइएको छ।
