काठमाडौ,१२ मंसिर । रुसी राष्ट्रपति भ्लादिमिर पुटिन आगामी डिसेम्बर ४–५ मा भारतको दुईदिने औपचारिक भ्रमणमा आउने भएका छन्। भारतीय प्रधानमन्त्री नरेन्द्र मोदीको निमन्त्रणामा हुने यस भ्रमणबारे जानकारी भारतीय विदेश मन्त्रालयले सार्वजनिक गरेको हो।
विज्ञप्तिअनुसार राष्ट्रपति पुटिनले नयाँ दिल्लीमा आयोजना हुने २३औँ भारत–रुस वार्षिक शिखर सम्मेलनमा सहभागिता जनाउनेछन्। भ्रमणका क्रममा प्रधानमन्त्री मोदीसँग द्विपक्षीय बैठक हुने तथा भारतकी राष्ट्रपति द्रौपदी मुर्मुसँग समेत शिष्टाचार भेट तय भएको उल्लेख गरिएको छ।
भारतीय विदेश मन्त्रालयका अनुसार यो उच्चस्तरीय भेटवार्ताले भारत–रुस सम्बन्धको समग्र समीक्षा गर्ने र दुवै देशबीचको दीर्घकालीन रणनीतिक साझेदारीलाई थप मजबुत बनाउने अवसर प्रदान गर्नेछ। यसका साथै, दुवै राष्ट्रका नेताहरूले क्षेत्रीय तथा विश्वव्यापी मुद्दामाथि पनि विस्तृत छलफल गर्ने अपेक्षा गरिएको छ।
पुटिन सन् २०२१ को डिसेम्बरपछि पहिलोपटक भारत आउने तयारीमा छन्। २०२२ मा रुस–युक्रेन युद्ध सुरु भएपछि उनले भारतको भ्रमण गरेका थिएनन्। त्यस्तै, सन् २०२३ सेप्टेम्बरमा नयाँ दिल्लीमा सम्पन्न जी–२० शिखर सम्मेलनमा पनि उनी सहभागी भएका थिएनन्।
