बीरगन्ज,०९ फागुन । प्रदीप यादव ले पर्सा निर्वाचन क्षेत्र नम्बर १ बाट प्रतिनिधिसभा सदस्यका लागि नेकपा एमाले को तर्फबाट उम्मेदवारी दर्ता गराएका छन्। केही समयअघि मात्र जनता समाजवादी पार्टी नेपाल परित्याग गरेर एमाले प्रवेश गरेका यादव यसपटक सूर्य चिन्ह लिएर चुनावी मैदानमा उत्रिएका हुन्।
बीरगन्ज मनियारी निवासी ५० वर्षीय यादव यसपटक लगातार तेस्रो जित हासिल गर्ने लक्ष्यसहित प्रतिस्पर्धामा छन्। उनी अनुभवी राजनीतिज्ञका रूपमा चिनिन्छन् र यसअघि स्वास्थ्य तथा जनसंख्या, खानेपानी तथा वन तथा वातावरण मन्त्रीको जिम्मेवारी सम्हालिसकेका छन्।
स्नातक तहसम्म अध्ययन गरेका यादवले २०७४ र २०७९ को प्रतिनिधिसभा निर्वाचनमा जसपाको तर्फबाट यही क्षेत्रबाट विजय हासिल गरेका थिए। २०७९ सालको निर्वाचनमा उनले २२ हजार ५३७ मत ल्याएर निकटतम प्रतिस्पर्धी स्वतन्त्र उम्मेदवार अजयकुमार द्विवेदी लाई पराजित गरेका थिए, जसले २० हजार ९१७ मत प्राप्त गरेका थिए।
त्यसैगरी, २०७४ सालको निर्वाचनमा यादवले २१ हजार १३२ मत ल्याउँदै नेपाली कांग्रेस का उम्मेदवार अनिलकुमार रुंगटालाई हराएका थिए। रुंगटाले उक्त निर्वाचनमा १६ हजार ४८१ मत पाएका थिए। पर्सा–१ बाट लगातार विजयी हुँदै आएका यादव अहिले एमालेबाट उम्मेदवार बनेका छन्। यद्यपि, पटक–पटक पार्टी परिवर्तन गरेको विषयले मतदातामा कस्तो प्रभाव पार्छ भन्ने कुरा भने आगामी निर्वाचन परिणामले स्पष्ट पार्नेछ।
