बीरगन्ज,१० फागुन । पर्सा क्षेत्र नम्बर–३ मा यस पटक राष्ट्रिय स्वतन्त्र पार्टी (रास्वपा) ले रामाकान्तप्रसाद चौरसियालाई उम्मेदवार बनाएको छ। ५७ वर्षका चौरसीया वीरगन्ज महानगरपालिका, वर्वागोगका स्थानीय हुन् र एलएसएलसीसम्मको अध्ययन पूरा गरेका छन्।
पूर्वमा लामो समय नेपाली कांग्रेसमा सक्रिय रहेका चौरसिया हाल रास्वपा प्रवेश गरेका छन् । कांग्रेस छोडेलगत्तै उनलाई पार्टीले टिकट दिएको हो। पेशागत रूपमा उनी निर्माण व्यवसायी हुन् र नेपाल निर्माण व्यवसायी संघ, पर्सा को नेतृत्व अनुभवसमेत राख्छन्।
संसदीय निर्वाचनमा चौरसिया पहिलोपटक मैदानमा उत्रिएका हुन् । उनी आफ्नो स्थानीय परिचय र व्यापारिक प्रभावलाई आधार बनाएर मतदातामाझ समर्थन जुटाउने प्रयासमा छन् । चौरसिया कांग्रेसका मतदातालाई पनि आफ्नो पक्षमा ल्याउन सक्रिय छन्, जसले उनको प्रतिस्पर्धात्मक शक्ति बढाउने आशा गरिएको छ।
अघिल्लो निर्वाचनमा रास्वपा पर्सा–३ मा प्रभावकारी नभएको थियो; २०७९ मा अशोक कँडेलले केवल ९२३ मत प्राप्त गरेका थिए। तर यसपटक राष्ट्रियस्तरमा रास्वपाको देशव्यापी माहोलको फाइदा चौरसियालाई हुनसक्ने विश्लेषकहरूको अनुमान छ।
उनको चुनावी रणनीति स्थानीय राजनीतिक पकड, व्यापारिक प्रतिष्ठा र नयाँ पार्टीको ऊर्जामा केन्द्रित छ। तर, संसदीय अनुभवको अभाव र नयाँ मताधार निर्माण गर्नु पर्ने चुनौतीले उनलाई कठिनाइमा राख्न सक्छ।
