काठमाडौँ,१२ चैत । नवनिर्वाचित स्वतन्त्र सांसद महावीर पुनले आफ्नो संसदीय कार्यकालमा शिक्षा क्षेत्रमा सुधारको प्राथमिकता रहने स्पष्ट पारेका छन्।
संसदको शपथ ग्रहणका लागि सिंहदरबार पुगेका पुनले सञ्चारकर्मीसँग कुरा गर्दै शिक्षामा व्याप्त राजनीतिकरणलाई अन्त्य गर्नु नै आफ्नो मुख्य एजेन्डा भएको बताए। उनले भने, “गर्नुपर्ने काम त टन्नै छन्, भनिसाध्य छैन, तर खासगरी शिक्षा क्षेत्रमा भइरहेको राजनीतिकरण हटाउनु मेरो मुख्य लक्ष्य हुनेछ।”
आफू जीवनभर चुनौती सामना गर्ने स्वभावको भएको उल्लेख गर्दै पुनले भविष्यको योजनाबारे अहिले ठोकुवा गर्न नसकिने बताए। उनले थपे, “भविष्यको कुरा कसैलाई थाहा हुँदैन, सायद भगवानलाई मात्र थाहा हुन्छ। त्यसैले अहिल्यै म यसो गर्छु, उसो गर्छु भनेर ठुला कुरा गर्नुको अर्थ छैन।”
महावीर पुनको यस स्पष्ट रचनात्मक दृष्टिकोणले आगामी कार्यकालमा शिक्षा क्षेत्रमा सुधार र राजनीतिक हस्तक्षेपको न्यूनिकरणमा केन्द्रित पहल हुने अपेक्षा गरिएको छ।
