काठमाडौं,१४ चैत । पक्राउ परेका पूर्वप्रधानमन्त्री तथा नेकपा एमालेका अध्यक्ष केपी शर्मा ओलीलाई स्वास्थ्य परीक्षणका लागि त्रिवि शिक्षण अस्पताल लगिएको छ।
भक्तपुरको गुण्डुस्थित निवासबाट पक्राउ परेपछि ओलीलाई प्रारम्भिक प्रक्रिया पूरा गर्न जिल्ला प्रहरी परिसर, भद्रकालीमा राखिएको थियो। त्यसपछि स्वास्थ्य अवस्थाको मूल्याङ्कन गर्न अस्पताल लगिएको प्रहरी स्रोतले जनाएको छ।
अस्पताल स्रोतका अनुसार ओलीलाई ‘रेड एरिया’ अन्तर्गत विशेष निगरानीमा राखिएको छ। उनको स्वास्थ्य परीक्षणमा मिर्गौला सम्बन्धी विशेषज्ञ चिकित्सकसमेत संलग्न गराइएको बताइएको छ।
परीक्षणपछि चिकित्सकको सुझावका आधारमा थप कानुनी तथा प्रशासनिक प्रक्रिया अघि बढाइने जनाइएको छ। यद्यपि, स्वास्थ्य अवस्थाबारे आधिकारिक विवरण सार्वजनिक भइसकेको छैन।
ओलीको पक्राउसँगै उत्पन्न राजनीतिक तरंगबीच उनको स्वास्थ्य अवस्थालाई लिएर पनि चासो बढेको छ। एमाले पक्षले स्वास्थ्य उपचारको सुनिश्चितता र मानवअधिकारको सम्मान हुनुपर्ने माग राखेको छ भने प्रहरीले कानुनी प्रक्रिया अनुसार काम भइरहेको जनाएको छ।
यस घटनाले आगामी दिनमा राजनीतिक र कानुनी बहस थप तीव्र हुने संकेत देखिएको छ।
