काठमाडाै,०५ वैशाख । अमेरिकी राष्ट्रपति डोनाल्ड ट्रम्पले तेहरानसँग शान्ति सम्झौता नभएसम्म इरानी जहाज र बन्दरगाहमाथिको अमेरिकी नाकाबन्दी जारी रहने बताएका छन्।
इरानले शुक्रबार स्ट्रेट अफ होर्मुजलाई पुनः व्यावसायिक जहाजका लागि खुला गरेको घोषणा गरे पनि ट्रम्पले अमेरिकी नाकाबन्दी भने यथावत् रहने स्पष्ट पारेका हुन्। उनले सामाजिक सञ्जालमार्फत इरानसँगको वार्ता पूर्ण निष्कर्षमा नपुगेसम्म नाकाबन्दी कायम रहने बताएका छन्।
अमेरिका र इरानबीच यसअघि पाकिस्तानको इस्लामाबादमा भएको वार्तामा परमाणु कार्यक्रम र युरेनियम भण्डारणको विषयमा सहमति हुन नसकेपछि तनाव कायम रहेको जनाइएको छ। ट्रम्पले विशेषगरी इरानले भण्डारण गरेको समृद्ध युरेनियम अमेरिकालाई हस्तान्तरण गर्नुपर्ने अडान दोहोर्याएका छन्।
यसबीच इरानले होर्मुज जलमार्ग खुला गरेको भए पनि अमेरिकी नाकाबन्दी जारी रहेमा फेरि मार्ग बन्द गर्न सकिने चेतावनी दिएको छ। उक्त जलमार्ग विश्वको करिब २० प्रतिशत तेल आपूर्तिसँग जोडिएको रणनीतिक मार्ग मानिन्छ।
ट्रम्पले चीनका राष्ट्रपति सी जिनपिङसँग आगामी बेइजिङ शिखर सम्मेलनमा विशेष भेटवार्ता हुने संकेत पनि दिएका छन्। उनले होर्मुज खुल्दा विश्व बजारमा सकारात्मक सन्देश गएको बताएका छन्।
यो घटनाक्रमले मध्यपूर्वको सुरक्षा, विश्व तेल बजार र अमेरिका–इरान सम्बन्धलाई थप संवेदनशील बनाएको विश्लेषण गरिएको छ।
