बीरगन्ज,०९ वैशाख । वीरगन्ज नाका हुँदै चालु आर्थिक वर्षको पहिलो ९ महिनामा वैदेशिक व्यापार उल्लेख्य रूपमा बढेको छ। वीरगन्ज भन्सार कार्यालयका अनुसार यस अवधिमा कुल रु. ६ खर्ब ९४ अर्ब ५ करोड बराबरका वस्तु तथा सामान नेपाल भित्रिएका छन्।
गत आर्थिक वर्षको सोही अवधिमा आयात रु. ६ खर्ब १३ अर्ब ६१ करोड रहेको थियो। यसअनुसार चालु वर्षमा करिब रु. ८० अर्बभन्दा बढीले आयात वृद्धि भएको देखिन्छ, जुन करिब १३ प्रतिशतको वृद्धि हो। आयात वृद्धिमा मुख्य रूपमा पेट्रोलियम पदार्थ र औद्योगिक कच्चा पदार्थको योगदान रहेको भन्सार कार्यालयले जनाएको छ। मात्र पेट्रोलियम पदार्थको आयात रु. १ खर्ब ४८ अर्ब १६ करोड पुगेको छ।
त्यस्तै, निर्माण क्षेत्रमा प्रयोग हुने फलाम तथा फलामजन्य सामग्रीको आयात बढेर रु. ६२ अर्ब २६ करोड पुगेको छ। उद्योगका लागि आवश्यक कच्चा भटमास तेलको आयात पनि उल्लेख्य रूपमा बढ्दै रु. ५० अर्ब ४० करोड पुगेको तथ्यांकमा उल्लेख छ।
मेसिनरी र इलेक्ट्रिकल उपकरणहरूको आयात पनि ठूलो मात्रामा बढेको देखिएको छ, जसले समग्र आयातको आकारलाई थप विस्तार गरेको छ। यस अवधिमा वीरगन्ज भन्सार कार्यालयले रु. १ खर्ब ७७ अर्ब ६६ करोड बराबरको राजस्व संकलन गर्न सफल भएको जनाएको छ।
