काठमाडौँ,२२ वैशाख । भारतको पश्चिम बङ्गाल विधान सभा चुनावमा भारतीय जनता पार्टी (भाजपा) ले ऐतिहासिक सफलता हासिल गर्दै पहिलो पटक सरकार गठन गर्ने अवस्थामा पुगेको छ। पछिल्लो मत परिणामअनुसार २९४ सदस्यीय विधान सभामा भाजपाले २०६ सिट जित्दै दुई तिहाइभन्दा बढी बहुमत सुरक्षित गरेको हो।
सत्तारूढ तृणमूल कांग्रेस ८० सिटमा सीमित भएको छ भने कम्युनिस्ट पार्टीले केवल २ सिट जितेको छ। बहुमतका लागि १४८ सिट आवश्यक पर्ने अवस्थामा भाजपाले स्पष्ट जनादेश प्राप्त गरेको भारतीय सञ्चारमाध्यमहरूले जनाएका छन्। मुख्यमन्त्री ममता बनर्जी आफ्नै भवानीपुर निर्वाचन क्षेत्रबाट भाजपा नेता शुभेन्दु अधिकारीसँग १५ हजारभन्दा बढी मतले पराजित भएकी छन्। सन् २०११ देखि लगातार सत्तामा रहेकी बनर्जी प्रधानमन्त्री नरेन्द्र मोदीकी प्रमुख राजनीतिक आलोचकका रूपमा चिनिन्थिन्।
प्रधानमन्त्री मोदीले पश्चिम बङ्गालको नतिजालाई “ऐतिहासिक उपलब्धि” भन्दै जनताको विश्वासको जित भएको बताएका छन्। यद्यपि विपक्षी दलहरूले निर्वाचनको निष्पक्षतामाथि प्रश्न उठाएका छन्। यसैबीच, दक्षिण भारतमा पनि राजनीतिक समीकरण बदलिएको छ। तमिलनाडुमा अभिनेता जोसेफ विजयको पार्टी तमिलगा वेट्ट्री कजगमले उल्लेखनीय सफलता हासिल गर्दै सत्तारूढ डिएमकेलाई चुनौती दिएको छ।
केरलामा भारतीय राष्ट्रिय कांग्रेस नेतृत्वको गठबन्धनले सत्तारूढ वामपन्थी सरकारलाई पराजित गरेको छ। यससँगै करिब ५० वर्षपछि भारतका कुनै पनि राज्यमा वामपन्थी सरकार नरहने अवस्था सिर्जना भएको छ।
उत्तरपूर्वी राज्य आसाममा भने भाजपाले लगातार तेस्रो कार्यकालका लागि सत्ता कायम राख्न सफल भएको छ।
