काठमाडौँ,०८ जेठ । राष्ट्रियसभाका सांसदहरूले सरकार गठन भएको ५६ दिन बितिसक्दा पनि सदनमा उठाइएका प्रश्नहरूको जवाफ नदिएको भन्दै आपत्ति जनाएका छन्। राष्ट्रिय स्वतन्त्र पार्टीका वरिष्ठ नेता बालेन्द्र शाह नेतृत्वको सरकार बनेपछि लामो समयसम्म पनि जनप्रतिनिधिले उठाएका विषयमा सरकार मौन रहेको भन्दै सांसदहरूले आलोचना गरेका हुन्।
बैठकमा सांसदहरूले जनतासँग सम्बन्धित समस्या र नीतिगत विषयमा बारम्बार उठाइएका प्रश्नहरूको जवाफ नआएको भन्दै सरकारप्रति असन्तुष्टि व्यक्त गरे। उनीहरूले “ढुङ्गा–माटो बोल्छ तर सरकार बोल्दैन” भन्ने शैलीमा टिप्पणी गर्दै सरकारको मौनतामाथि प्रश्न उठाए।
नेपाली कम्युनिस्ट पार्टीका सांसद नरबहादुर विष्ट र नेकपा एमालेका सांसद सोमनाथ पोर्तेलले जनताका समस्या सदनमा उठाइए पनि सरकारबाट कुनै प्रतिक्रिया नआउनु गम्भीर विषय भएको बताए।
सांसद पोर्तेलले जनप्रतिनिधिले उठाएका प्रश्नको जवाफ दिन सभामुखमार्फत रुलिङ गर्नुपर्ने माग पनि गरे। उनले सरकारको मौनतालाई अस्वीकार्य भन्दै तत्काल जवाफ दिन आग्रह गरे।
त्यस्तै सांसद विष्टले पनि सरकार गठन भएको लामो समयसम्म राष्ट्रियसभामा उठाइएका प्रश्नहरू बेवास्ता हुनु उपयुक्त नहुने टिप्पणी गरे। सांसदहरूले सरकारलाई संसदप्रति उत्तरदायी बन्न र जनताका सरोकारका विषयमा स्पष्ट जवाफ दिन आग्रह गरेका छन्।
