काठमाडौं । प्रदेश २ मा दुई हप्ता नवित्दै २ जना महिलामाथि जिउँदै जलाएर हत्या गर्ने प्रयास भएका छन् । गत बैशाख ५ गते धनुषामा २० वर्षीया नवविवाहित युवति निर्मला यादवलाई पति मुकेश यादव गोइतले मट्टीतेल खन्याएर आगो लगाएको घट्ना सेलाउन नपाउँदै फेरी सिराहमा पनि उस्तै घट्ना दोहोरिएको छ ।
घरायसी विवादमा सिरहा नगरपालिका वडा नम्बर ८ की २१ वर्षीया कञ्चनदेवी मण्डल खत्वेलाई पति बेचन मण्डलले मट्टीतल खन्याएर आगो लगाएको छ । कञ्चनको शरीरको ८० प्रतिशत भाग आगोले जलेको छ । घाइते कञ्चनको अवस्था अहिले गम्भीर छ। उनको धरानस्थित विपी कोइराला स्वास्थ्य विज्ञान प्रतिष्ठानमा उपचार सम्भव नभएपछि काठमाडौं ल्याइएको छ।
उनका श्रीमान र सासु मिलेर कञ्चनको जिउमा आगो लगाइएको बताइएको छ । बिहीबार घरमा भएको सामान्य विवादपछि यो घटना घटेको हो ।
घटनापछि कञ्चनकी सासुलाई प्रहरीले नियन्त्रणमा लिएको छ । उनका श्रीमान बेचन मण्डल खत्वे भने फरार रहेको सिरहाका प्रहरी उपरीक्षक जीवन श्रेष्ठले जानकारी दिए ।
तराई मधेशका चेलीहरु विभिन्न बहानामा हिंसाको सिकार बनिरहेका छन् । सामान्य विवाद मै उनीहरु जिउँदै जलेर ज्यान गुमाउनुपर्ने बाध्यात्मक अवस्थामा छन् ।
कहिले दाइजोका नाममा त कहिले अन्य बहानामा परिवारकै सदस्यले लगाएको आगोमा परी ज्यान गुमाउनेको संख्या बढ्दै गएको छ ।
