काठमाडौं,१९ वैशाख । भारतीय राजनीतिमा पछिल्लो समय आम आदमी पार्टी (आप) का नेता राघव चड्ढाको दल परिवर्तन चर्चाको केन्द्रमा पुगेको छ। उनले आम आदमी पार्टी छोडेर भारतीय जनता पार्टी (भाजपा) मा प्रवेश गरेपछि भारतीय राजनीतिक वृत्तमा नयाँ बहस सुरु भएको छ।
यसैबीच, पूर्व क्रिकेटर तथा राजनीतिज्ञ नवजोत सिंह सिद्धूकी पत्नी नवजोत कौर सिद्धूले दिएको एक अभिव्यक्तिले थप चर्चा चुलिएको छ। उनले एक पोडकास्ट कार्यक्रममा अभिनेत्री प्रियंका चोपडाको नाम जोड्दै राघव चड्ढाको राजनीतिक निर्णयसँग सम्बन्धित विभिन्न दाबी गरेकी छन्।
उनका अनुसार राघव चड्ढामाथि राजनीतिक दबाब बढिरहेको थियो र त्यसकै प्रभावले उनको पार्टीभित्र दूरी बढ्दै गएको हुनसक्छ। साथै, लामो समयसम्म सार्वजनिक रूपमा धारणा नखुलाउँदा पनि पार्टीभित्र असन्तोष बढेको दाबी गरिएको छ।
तर, राघव चड्ढा, प्रियंका चोपडा तथा परिणीति चोपडाले यस विषयमा सार्वजनिक प्रतिक्रिया दिएका छैनन्।
भाजपामा प्रवेश गरेपछि राघव चड्ढाले सामाजिक सञ्जालमा केही समर्थन गुमाएको चर्चा पनि भारतीय सञ्चारमाध्यममा भइरहेको छ। उनको निर्णयप्रति विभिन्न राजनीतिक दल, समर्थक तथा सेलिब्रेटीहरूबाट मिश्रित प्रतिक्रिया आइरहेका छन्।
राघव चड्ढाको यो कदमलाई भारतीय राजनीतिमा महत्वपूर्ण राजनीतिक पुनर्संरचनाका रूपमा हेरिएको छ।
