वीरगञ्ज । अख्तियार दुरुपयोग अनुसन्धान आयोगको कार्यालय हेटौँडाबाट खटिएको टोलीले यातायात व्यवस्था कार्यालय वीरगञ्जका दुई जना विचौलियालाई ३१ हजार घुस रकम सहित पक्राउ गरेको छ । पक्राउ पर्नेमा वीरगञ्ज महानगरपालिका ९ रानीघाट निवासी ३४ वर्षीया रोशनकुमार रौनियार र बाराको करैयामाई गाउँपालिका ७ उमजन निवासी २८ वर्षीया सुनील यादव रहेका छन् ।
लाइसेन्स बनाइदिने आश्वासन दिएर सेवाग्राहीसँग ३१ हजार रुपैयाँ घुस लिएपछि अख्तियारले उनीहरुलाई यातायात व्यवस्था कार्यालय अगाडि वीरगञ्ज महानगरपालिका १३ स्थित शिखर इन्स्योरेन्सको तेस्रो पक्ष बीमा कलेक्सन काउन्टरबाट पक्राउ गरेको हो ।
सो क्रममा उनीहरुको साथबाट अख्तियारको टोलीले नगद ३१ हजार रुपैयाँ र केही कागजपत्र समेत बरामद गरेको छ ।
