बीरगंज — विगत एक सातादेखि मध्य तराईका जिल्लामा गर्मी बढेसँगै ‘लु’ तातो हावा चल्न थालेको छ । मध्य तराईका बारा, पर्सा, रौतहट, सर्लाही, धनुषा, महोत्तरी लगायत जिल्लामा गर्मीसँगै तातो हावा चल्न सुरु भएको हो ।
गर्मीका कारण यस क्षेत्रको जनजीवन प्रभावित भएको छ । दिउँसो ‘लु’ चल्नाले गर्मीमा हिँडडुल गर्न र खुला आकाशमुनि काम गर्न समस्या भएको स्थानीयले बताएका छन् । बीरगंजको तापक्रम लगातार बढै गएको छ । आजको वीरगंजको तापक्रम ३९ डिग्रि सेल्सियस पुगेको छ ।
गर्मीले सबैभन्दा बढी मारमा विद्यालय जाने बालबालिका परेका छन् । नयाँ शैक्षिक सत्रको सुरुवातमै गर्मी बढेपछि विद्यार्थीलाई गर्मीको मार खेप्नुपरेको छ । समयसमयमा पानी परे पनि गर्मी बढ्दै गएकाले बीरगंज आसपासको जनजीवन अस्तव्यस्त बन्दै गएको छ । गर्मी बढेर तातो हावा चल्न थालेपछि घरबाहिर निस्कनसमेत गाह्रो भएको छ । गर्मीले बजार, शैक्षिक संस्था, सरकारी कामकाजमा समेत प्रभाव पार्न थालेको छ । बाराका उत्तरी क्षेत्रका ग्रामीण बस्तीहरुमा गर्मी बढेपछि खानेपानीको समेत अभाव भएको छ । गर्मीले गर्दा हाते कलहरू सुक्न थालेका छन् ।
वाराको निजगढ, रतनपुरी लगायतका क्षेत्रमा खानेपानीका समस्या भएको स्थानिय वासिन्दाले बताएका छन । गमी बढदै गएपछि जन स्वास्थ्यमा समेत नकारात्मक प्रभाव पार्दै गइरहेको छ । तातो हावा र अत्यधिक गर्मीका कारण बिरामीको संख्यामा पनि वृद्धि भएको छ । गर्मीका कारण विषालु सर्प ग्रामीण क्षेत्रमा देखा पर्न थालेको स्थानिय वासिन्दाले बताएका छन् ।
गर्मी बढेसँगै नारायणी अस्पताल लगायतका वीरगंज तथा वारा, पर्साका अस्पतालहरुमा बिरामीको संख्या पनि बढेको छ । भाइरल ज्वरो, टाइफाइड, झाडापखाला, छाला सम्बन्धीलगायत बिरामी बढ्दै गएको नारायणी अस्पतालका छाला रोग बिशेषज्ञ डा. अतुलेस चौरसिया जानकारी दिनुभयो । हाल नारायणी अस्पतालमा मात्रै दैनिक उपचारका लागि ५ सय भन्दा बढी विरामी आउने गरेको चौरसियाले बताउनु भयो । गर्मीमा छाता ओढेर हिँडडुल गर्न, प्रशस्त पानी खान, छायामा बस्न, लामखुट्टेको टोकाइबाट जोगिन, बासी खानेकुरा नखानलगायत सुझाव चिकित्सकले दिएका छन् ।
