बारा – ८ वटा स्थानीय तहमा १५ शैय्याको अस्पताल निर्माण हुने भएको छ । जनघनत्व, बहिरङ्ग सेवाको चाँप, अन्य अस्पतालसँगको दुरी र प्राथमिक स्वास्थ्य केन्द्रहरु मध्ये अस्पताल नरहेका, सम्बन्धित स्थानीय तहका स्वास्थ्य संस्थालाई १५ शैय्याको अस्पतालमा स्तरोन्नति गन लागीएको हो ।
पहिलो चरणमा जीतपुरसिमरा उपमहानगरपालिका, कलैया उपमहानगरपालिका, निजगढ नगरपालिका, कोल्हवी नगरपालिका, पचरौता नगरपालिका, महागढिमाई नगरपालिका, फेटा गाँउपालिका, र सुवर्ण गाँउपालिकामा १५ शैय्याको अस्पताल निर्माण हुनेछ ।
स्थानीय तहको सिफारिसमा सिमराको सिमरा प्राथमिक स्वास्थ्य केन्द्र, कलैयाको सुरत स्वास्थ्य चौकी, निजगढको निजगढ प्राथमिक स्वास्थ्य केन्द्र कोल्हवीको कोल्हवी प्राथमिक स्वास्थ्य केन्द्रलाई स्तरोन्नति गरि अस्पताल बनाइने छ ।
त्यस्तै पचरौताको बेलडारी स्वास्थ्य चौकी, महागढिमाईको गंजभवानिपुर प्राथमिक स्वास्थ्य केन्द्र, फेटाको फेटा स्वास्थ्य चौकी र सुवर्ण गाँउपालिकाको हर्दिया प्राथमिक स्वास्थ्य केन्द्रलाई १५ शैय्याको अस्पतालमा स्तरोन्नति गन लागीएको हो ।
आकस्मिक स्वास्थ्य सेवा कार्यान्वयन गर्न र स्वास्थ्य सेवालाई नियमित, प्रभावकारी, गुणस्तरीय तथा सर्वसुलभ बनाई नागरिकको पहुँच स्थापित गर्न १५ शैय्याको अस्पताल निर्माण गर्ने आर्थिक वर्ष २०७५/७६ को नीति तथा कार्यक्रममा उल्लेख छ ।
योजना कार्यान्वयन गर्न चालु आर्थिक वर्ष २०७५/०७६ मा सरकारले ७५ करोड बजेट विनियोजन गरेको छ ।
