विराटनगर, २२ वैशाख — भन्सारको १० करोड राजस्व अपलचन गरेको आरोपमा उच्च अदालतले भन्सार एजेन्ट र बैंक कर्मचारीलाई कैदको फैसला सुनाएको छ ।
विराटनगर भन्सार कार्यालयमा रहेको वाणिज्य बैकको काउण्टर मार्फत दश करोड भन्सार राजस्व अपचलनको आरोप लागेका भन्सार एजेन्ट सुरेश बोहोरा र बैैंकका कर्मचारीलाई उच्च अदालत विराटनगरले कैद र जरिवनाको फैसला सुनाएको हो ।
मिलेमतोमा बैंकमा राजस्व दाखिला नगरी अपचलन गरेको रहस्य सार्वजनिक भएपछि बैकिङ कसुर मुद्दामा एजेण्ट सुरेश बोहोरा, बैंकका कर्मचारी तोर्णराज राउत र विष्णुप्रसाद न्यौपानेलाई उच्च अदालत विराटनगरले वैशाख १७ गते कैद र जरीवाना गर्ने फैसला गरेको हो । भन्सार एजेण्ट सुरेशका भाइ ललितले भने सफाइ पाएका छन् ।
अदालतका कायममुकायम मुख्यन्यायाधीश शिवराम अधिकारी र न्यायाधीश महेश शर्मा पौडेलको संयुक्त्त इजलासले एजेन्ट बोहोरालाई बैकिङ कसुर ऐन २०६४ को दफा ३ (ग) र दफा १५ को (१) बमोजिम डेढ महिना कैद र ४ करोेड ८० लाख ७७ हजार ५ सय रुपैयाँ जरिवना फैसला गरेको छ ।
त्यस्तै बैंकका कर्मचारी तोर्णराज राउत र विष्णुप्रसाद न्यौपानेलाई सोही ऐन अनुसार २२ दिन कैद र जनही २ करोड ४० लाख ३८ हजार ७५० रुपैयाँ जरीवना गर्ने फैसला गरेको छ ।
२०७४ फागुन १ गते घटना सार्बजनिक भएपछि एजेण्टद्वय फरार थिए । ०७५ साउन ६ अदालतनमा सुटुक्क हाजिर भएका उनीहरुलाई न्यायाधीश थीरबहादुर कार्की र बालेन्द्र रुपाखेतीको संयुक्त्त इजलासले सुरेशलाई ८० लाख र ललितलाई २५ लाख धरौटीमा छाडेको थियो । धरौटीमा छाडेको ८ महिनापछि अदालतले फैसला सुनाएको हो ।
