काठमाडौं । नेपाली कांग्रेसका नेता शेखर कोइरालाले नेकपाले सत्ता कब्जा गर्न लागेको आरोप लगाएका छन् । बुधबार काभ्रेको धुलिखेलमा ‘राष्ट्रिय जागरण अभियान’ को उद्घाटन गर्दै नेता कोइरालाले भने, सरकार गठन भए यताको क्रियाकलाप हेर्दा नेकपाले सत्ता कब्जा गर्न खोजेको देखिन्छ ।’
उनले मंगलबार प्रतिनिधिसभामा नीति तथा कार्यक्रम पारित गर्ने क्रममा सभामुख कृष्णबहादुर महराले प्रधानमन्त्रीको पक्ष लिएको आरोप लगाए । ‘संसदमा हामीले बोलेको रेकर्डबाट तुरुन्तै हटाउने अनि प्रधानमन्त्रीको बोली हटाउन नसक्ने वा पछि हटाए पनि हुने भन्ने हुन्छ ?’ कोइरालाले भने ‘कार्यपालिका र व्यवस्थापिका एउटै अंग भइसकेको छ, न्यायपालिका पनि कार्यपालिकाको एउटा अंग जस्तो भएको छ ।’
राजस्व अनुसन्धान, सम्पत्ति शुद्धिकरण, अनुसन्धान विभाग आदि प्रधानमन्त्री अन्तर्गत ल्याउनु सत्ता कब्जाको पूर्वअभ्यास भएको कोइरालाको दाबी छ ।
कार्यक्रममा बोल्दै कोइरालाले नेपाली सेनालाई पनि सरकारले विवादित गर्ने प्रयास गरेको बताए । सबै विकासका काम दिएपछि सेनाले गर्नुपर्ने काम गर्न नसकेको उनको भनाइ छ ।
