काठमाडौं । बुधबार साँझ कालोपुलमा २० वर्षीया जेनी खड्कामाथि एसिड प्रहार भयो । एसिडले जेनीको शरीरको विभिन्न भागहरु जलेको प्रहरीले जनाएको छ । जेनीलाई एसिड हानेको अभियोगमा प्रहरीले २७ वर्षीय विकास भनिने विष्णु भुजेललाई पक्राउ गरेको छ ।
पक्राउ परेका भुजेल जेनीको श्रीमान रहेको अनुसन्धानको क्रममा खुलेको प्रहरीले जनाएको छ । जेनीको अहिले कीर्तिपुरस्थित फेक्ट अस्पतालमा उपचार भइरहेको छ । काठमाडौँ प्रहरी परिसरका प्रवक्ता डीएसपी होमेन्द्र बोगटीका अनुसार जेनीको अहिले अप्रेशन हुँदैछ ।
आर्थिक अवस्था कमजोर रहेकाले उपचारमा समस्या भएको जेनीको परिवारले जनाएको छ । जेनीको अवस्था चिन्ताजनक रहेको अस्पताल स्रोतले जनाएको छ ।
प्रहरीका अनुसार भुजेलले जेनीलाई १० कक्षामा पढ्दापढ्दै ६ वर्षअघि भगाएर विवाह गरेका थिए । त्यतिबेला जेनी १४ वर्षकी थिइन् ।
बिहे भएको ३ वर्षपछि उनीहरुबाट एउटा छोराको जन्म भयो । अहिले छोरा तीन वर्षमा लागेको छ ।
प्रहरीका अनुसार भुजेलको जेठी श्रीमती पनि रहेको जेनीले पछिमात्रै थाहा पाएकी थिइन् । त्यसपछि उनीहरुबीच असमझदारी बढ्न थालेको र पछिल्लो समय उनीहरु छुट्टाछुट्टै बस्दै आएका थिए । भुजेल काभ्रेमै बस्थे भने जेनी कालोपुलमा बुबाआमासँग बस्दै आएकी थिइन् ।
प्रहरीका अनुसार बेला–बेला भुजेलले जेनीलाई आफूसँग बस्न आग्रह गरेपनि जेनीले नमानेपछि कुनै पनि बेला मारिदिने धम्की दिने गर्थे । विकासले प्रहरी समक्ष श्रीमती आफूसँग बस्न नमानेपछि एसिड हानेको स्वीकारेका छन् । भुजेलको पहिलो श्रीमती हाल वैदेशिक रोजगारीको क्रममा खाडीमुलूकमा रहेको बताइएको छ ।
