काठमाडौं । प्रमुख सत्तारुढ दल नेपाल कम्युनिष्ट पार्टी नेकपाको सचिवालय बैठक आज बस्दैछ । एकता प्रक्रियाको कामलाई अन्तिम रुप दिन सचिवालय बैठक बस्न लागेको नेकपाका प्रवक्ता नारायणकाजी श्रेष्ठले जानकारी दिए ।
एकतासम्बन्धी बाँकी काम सकाउन शीर्ष नेताले पाएको जिम्मेवारीलाई सचिवालयले अन्तिम रुपम दिनेछ । पार्टीका अध्यक्षद्वय केपी शर्मा ओली, पुष्पकमल दाहाल प्रचण्ड, बरिष्ठ नेता माधवकुमार नेपाल, झलनाथ खनालसहितका शीर्ष नेताले एकता प्रक्रियाका बाँकी विषयलाई टुंग्याउन गृहकार्य गरेका थिए । शीर्ष नेताहरुबीचको छलफलबाट प्राप्त निष्कर्षलाई आजको बैठकले अनुमोदन गर्ने श्रेष्ठले बताए ।
सोही अनुसार शीर्ष नेताहरुबीचको छलफल र निष्कर्षलाई सचिवालय बैठकले अन्तिम रुपम दिने श्रेष्ठले बताए । ‘हामीले एकता प्रक्रियाका प्रायः सबै काम सकेका छौं । केहि विषयलाई अन्तिम रुप दिनुपर्ने थियो । त्यसलाई पनि शीर्ष नेताहरुले मोटामोटी रुपमा टुंग्याउनु भएको छ । आजको सचिवालय बैठकमा शीर्ष नेताले गरेको सहमतिलाई अन्तिम रुप दिने प्रयास हुनेछ,’ प्रवक्ता श्रेष्ठले भने, ‘आजको सचिवालय बैठक एकता प्रक्रियालाई टुंग्याउने विषय मै केन्द्रित हुनेछ ।’
