काठमाडौं– शुक्रबार मध्याह्न त्रिभुवन अन्तर्राष्ट्रिय विमानस्थलबाट पक्राउ परेका युनुस अन्सारीसहितका ३ नेपाली र ३ पाकिस्तानी गरी ६ जनाबाट पौने ८ करोड नक्कली भारतीय रुपैयाँ (भारु) नोट बरामद भएको प्रहरीले जनाएको छ ।
प्रहरीका अनुसार कतार एयरवेजको विमानबाट काठमाडौं उत्रिएका ३ जना पाकिस्तानी नागरिकले २ वटा व्रिफकेसमा नक्कली भारु बोकेका थिए ।
नक्कली नोट बाकेर काठमाडौं उत्रिएका पाकिस्तानी नागरिकलाई लिन युनुस अन्सारीसहित ३ जना नेपाली विमानस्थल पुगेका थिए ।
उनीहरुलाई २ वटा व्रिफकेससहित विमानस्थलबाटै पक्राउ गरिएको प्रहरीले जनाएको छ ।
पक्राउ पर्नेमा युनुस अन्सारीसहित नेपाली नागरिक साहेल खान (युनुसका नातेदार), सुजन रानाभाट (युनुसको गाडीका ड्राइभर छन् । पाकिस्तानी नागरिकमा नासिर उद्दिन (पासपोर्ट एआर २४०६४३२०), नादिया अनवर (पासपोर्ट सीएन १८१२०३२०) र मुहम्मद अख्तर (एए १३४५४९४०) छन् ।
नेपाल प्रहरीको अन्तर्राष्ट्रिय विमानस्थल सुरक्षा कार्यालयका प्रहरी वरिष्ठ उपरीक्षक सन्दीप भण्डारीले उनीहरुबाट बरामद भएको नक्कली भारु ७ करोड ६७ लाख ९४ हजार रहेको बताए ।
को हुन् पक्राउ परेका अन्सारी ?
शुक्रबार विमानस्थलबाट पक्राउ परेका युनुस यसअघि पनि जाली नोट र लागू औषध तस्करी प्रक्ररणमा जेल सजाय काटेर रिहा भइसकेका व्यक्ति हुन् ।
पूर्वमन्त्री सलिम मियाँ अन्सारीका छोरा युनुस करिब २ दशकदेखि जाली भारतीय रुपैयाँको कारोबारमा संलग्न व्यक्ति हुन् । ५ वर्ष अगाडि निधन भइसकेका बुवा सलिमसँग युनुसको राम्रो सम्बन्ध थिएन।
छोराको ‘काम’प्रति असन्तुस्ट रहेका सलिमले पछिल्लो समय युनुससँगको बालचाल नै बन्द गरिदिएका थिए ।
नेपाल प्रहरीको विशेष ब्यूरोले अन्सारी पाकिस्तानी गुप्तचर संस्था आईएसआईको ‘भारतविरोधी गतिविधि’अन्तर्गत नेपालमा जाली भारतीय नोटको जालो चलाउन सक्रिय छन् ।
उनी यसअघि २ पटक पक्राउ परि जेल सजाय समेत भोगिसकेका व्यक्ति हुन् । अन्सारीलाई १८ पुस २०६५ मा प्रहरीको विशेष ब्यूरोले जाली नोटसहित पक्राउ गरेको थियो ।
त्यतिबेला प्रहरीले उनी बस्ने त्रिपुरेश्वरको ब्लूबर्ड होटलको कोठामा पाकिस्तानीबाट मगाएर लुकाएर राखेको २५ लाख ४४ हजार नक्कली भारतीय रुपैयाँ बरामद गरेको थियो ।
अन्सारी जाली नोट कारोबारको सजाय भोगेर पहिलोपटक जेलबाट छुटेको ३ महिना पनि नबित्दै पुनः ११ माघ २०७० मा २ सहयोगीसहित ललितपुरको नख्खिपोटबाट पक्राउ परेका थिए ।
प्रहरीको विशेष टोलीले छापा मार्दा नख्खीपोटस्थित अन्सारीको निवासबाट ३५ लाख जाली भारतीय रुपैयाँ फेला पारेको थियो ।
कारागारभित्र रहँदा समेत उनले पाकिस्तानबाट जाली नोट मगाउने गरेको प्रहरी अनुसन्धानबाट खुलेको थियो । आईएसआईका लागि ‘बाबर कोड’ नामबाट परिचित अन्सारी जेलभित्रैबाट समेत जाली नोटको कारोबारमा संलग्न रहेपछि उनको हत्या प्रयास समेत भएको थियो ।
उनीमाथी दुई पटक हत्या प्रयास समेत भएको छ । जाली नोट र लागूऔषधसम्बन्धी मुद्दाको सजायका लागि केन्द्रीय कारागारमा थुनामा रहँदा अन्सारीमाथि २६ फागुन २०६७ मा गोली प्रहार भएको थियो ।
अन्सारीकै प्रत्यक्ष संलग्नतामा जेलभित्रै रहँदा उनले मगाएको ४० लाख ९० हजार जाली भारतीय रुपैयाँ ६ असोज २०६७ मा त्रिभुवन बिमानस्थलबाट बरामद भएको थियो ।
अन्सारीले पाकिस्तानी लगानीमा नेशनल टेलिभिजन सञ्चालन गरेका थिए । प्रहरीको विशेष व्यूरोले गरेको अनुसन्धानबाट उनले टेलिभिजनको नामबाट समेत जाली नोटको कारोबार गर्ने गर्ने गरेको र एक महिला पत्रकारहरुलाई समेत भरिया बनाएको खुलेको थियो ।
भारतले लामो समयदेखि अन्सारी पाकिस्तानी गुप्तचर संस्था आईएसआईको मिलोमतोमा नेपालमा जाली भारतीय नोटको जालो फैलाउन सक्रिय रहेको भन्दै उनीमाथि कारबाहीका लागि नेपाली निकायलाई पत्र पठाउने गरेको छ ।
