जनकपुरधाम,बैशाख १९ गते—धनुषा जिल्लाको भारतीय सीमासित जोडिएको मुखियापट्टी मुसर्निया गाउँपालिकाबाट प्रहरीको लुटिएको पेस्तोल भेटिएको छ ।
करिब २५ जनाको समुहमा रहेको तस्करहरुले नेपालबाट मदिरा भारत तर्फ तस्करी गरी लग्ने क्रममा प्रहरीसित झडप भएको थियो ।
जिल्ला प्रहरी कार्यालय धनुषाका प्रहरी नायव उपरिक्षक (डीएसपी) रामेश्वर कार्कीले खोसिएको पेस्तोल फेला परेपनि लुट्नेको खोजी जारी रहेको बताए।
उनले अनुसन्धानको क्रममा मुखियापट्टी मुसर्निया गाउँ पालिका वडा नम्बर १ बस्ने सकुन्तला देवी यादवलाई नियन्त्रणमा लिएको बताए ।लुटिएको पेस्तोल खाली रहेको र म्यागजिन असईसँगै रहेको बताईएको छ ।
घटनास्थलमा जिल्ला प्रहरी कार्यालय धनुषाका अर्का डीएसपी ज्ञान महतोको नेतृत्वमा व्यापक प्रहरी परिचालन गरिएको छ ।
भारतको मधुवनी जिल्लामा मई ६ तारेखमा निर्वाचन हुन लागेको छ । बिहार राज्यमा रक्सी प्रतिबन्ध छ ।तर चुनावमा मतदातालाई प्रभावित गर्न चोरीलुकी मदिरा वितरण हुने गरेकाले नेपालबाट तस्करी बढेको बताईन्छ ।
