मनाङ, ४ चैत्र । यस वर्षको माध्यमिक शिक्षा परीक्षा (एसईई) मा मनाङबाट ४६ जना विद्यार्थी सहभागी हुने भएका छन् । चैत ७ गतेदेखि सुरु हुने परीक्षा सदरमुकाम चामेस्थित लोकप्रिय माविमा सञ्चालन हुने शिक्षा समन्वय एकाइ मनाङका प्रमुख ध्रुवप्रसाद कोइरालाले जानकारी दिएका छन् । उनका अनुसार नियमिततर्फ ४१ जना र ग्रेडवृद्धि तर्फ ५ जना परीक्षार्थी सहभागी हुनेछन् ।
मनाङमा चारवटा स्थानीय तह रहेका छन्, तर नार्पाभूमि गाउँपालिकाबाट भने कुनै पनि विद्यार्थी एसईईमा सहभागी हुने छैन न्। नासोँ गाउँपालिकाको प्रकाशज्योति माविबाट २१ जना, ङिस्याङ गाउँपालिकाको अन्नपूर्ण माविबाट ४ जना र चामे गाउँपालिकाको लोकप्रिय माविबाट १६ जना परीक्षामा सहभागी हुनेछन् ।
यस वर्ष ग्रेड सुधार परीक्षा दिने विद्यार्थीहरूमध्ये प्रकाशज्योति माविबाट २ जना र लोकप्रिय माविबाट ३ जना रहेका छन्। मनाङको भौगोलिक कठिनाइका कारण विद्यार्थीहरू लामो यात्रा गरेर परीक्षा केन्द्र चामे पुग्नुपर्ने अवस्था छ । दुर्गम क्षेत्रका विद्यार्थीहरूलाई सहज परीक्षा वातावरण बनाउन सरोकारवाला निकायले आवश्यक ध्यान दिनुपर्ने शिक्षा क्षेत्रका जानकारहरूले बताएका छन्।
