काभ्रेपलाञ्चोक,२४ चैत । काभ्रेपलाञ्चोक जिल्लाका कोशीपूर्व क्षेत्रका दुई प्रमुख सडकहरूमा स्तरोन्नति कार्य जारी छ। यसमा अरनिको राजमार्गसँग जोडिएको दोलालघाट-फलाँटे-कोलाँती-पोखरीचौरी-गुराँसे खण्ड र सोही खण्डसँग जोडिएको भुम्लु गाउँपालिका क्षेत्रको हबेली-सापिङ-सिम्थली-बेखसिम्ले-वाफल खण्ड शामिल छन्।
बागमती प्रदेश सरकारको ग्रामीण सडक सञ्जाल सुधार आयोजना (एएफ) अन्तर्गत छ दशमलव पाँच किलोमिटर सडक विस्तार कार्य भइरहेको छ। आयोजना कार्यालयका कार्यक्रम व्यवस्थापक उषेश श्रेष्ठका अनुसार, गत असोज महिनामा आएको बाढीपहिरोले सडकको एक दशमलव पाँच किमी भागलाई क्षति पुर्याएको थियो, जसका कारण उक्त क्षेत्रमा नयाँ डिजाइन गर्नुपर्ने भएको हो।
विस्तारित सडकमा हाल नाली, टेवा पर्खाल, ग्याबिन निर्माणको काम अन्तिम चरणमा पुगेको छ। आगामी सातादेखि ग्रेडिङको काम सुरु हुने तयारी भइरहेको छ। यस परियोजनाको लागत १२ करोड रुपैयाँ रहेको छ, जसका लागि एसियाली विकास बैंक (एडिबी)ले लगानी गरेको हो। परियोजना कार्य समयमा सम्पन्न गर्न निर्माण कम्पनीले तीव्र गतिमा काम गर्दैछ।
यसैबीच, हबेली-सापिङ-सिम्थली-बेखसिम्ले-वाफल सडक खण्डमा कालोपत्रको काम पनि सुरु भएको छ। प्रदेश सरकारको बजेटमा सुरु गरिएको उक्त कार्यमा पहिलो चरणमा तीन किमी २०० मिटर सडकको कालोपत्र र ४०० मिटर ढलानको काम गरिनेछ। यस सडकको निर्माण कार्य आगामी मङ्सिर महिनासम्म पूरा हुने लक्ष्य राखिएको छ।
