काठमाडौं,२५ चैत्र । काठमाडौं महानगरपालिकाका जनप्रतिनिधि र कर्मचारीले तीन महिनापछि रोकिएको तलब पाएका छन्। सोमबार सबैको खातामा तलब जम्मा भएको महानगरका प्रवक्ता नवीन मानन्धरले जानकारी दिएका छन्।
महानगरमा प्रमुख प्रशासकीय अधिकृत नहुँदा तीन महिनादेखि तलब रोकिएको थियो। यसले कर्मचारी र जनप्रतिनिधिमा असन्तोष चुलिँदै आएको थियो। रोकिएको तलबको विषयमा कर्मचारीहरूले सरकारप्रति आक्रोशसमेत व्यक्त गरेका थिए।
गत पुस ७ गतेदेखि बिदामा रहेका प्रमुख प्रशासकीय अधिकृत सरोज गुरागाईं बिहीबार कार्यालय हाजिर भएपछि तलब दिने प्रक्रिया अघि बढाइएको हो। गुरागाईंको हाजिरीसँगै कार्यालयमा केहीबेर तनावपूर्ण अवस्था सिर्जना भए पनि त्यसपछि स्थिति सामान्य भएको थियो।
गुरागाईंले हाजिर भएको भोलिपल्टै तलब सम्बन्धी प्रक्रिया अघि बढाउँदै सबै जनप्रतिनिधि र कर्मचारीलाई तलब दिलाउने निर्णय गरेका थिए।
