काठमाडौं, ३० चैत — चीनले अमेरिकी सामानमा १२५ प्रतिशत कर लगाउने घोषणा गरेपछि अमेरिकी राष्ट्रपति डोनाल्ड ट्रम्पले पहिलो प्रतिक्रिया दिएका छन्।
ट्रम्पले सामाजिक सञ्जाल प्लेटफर्म ‘ट्रुथ सोसल’ मा एक पोस्ट गर्दै अमेरिकाले आफ्नो ट्यारिफ (कर) नीतिमा ‘साँच्चिकै राम्रो काम गरिरहेको’ बताएका छन्। उनले लेखेका छन्, ‘यो संसार र अमेरिकाका लागि धेरै रोमाञ्चक छ। यो द्रुत गतिमा अगाडि बढिरहेको छ।’
गत हप्ता मात्रै राष्ट्रपति ट्रम्पले चीनमाथि थप ३४५ प्रतिशत कर लगाउने घोषणा गरेका थिए, जुन अप्रिल ९ मा लागू हुने भनिएको थियो। तर, त्यसको केही घण्टाअघि नै ट्रम्पले थप ५०५ प्रतिशत कर बढाउने घोषणा गरे।
यसको प्रतिक्रियामा, चीनले बुधबार अमेरिकी सामानहरूमा कर ५० प्रतिशतले बढाएर ८४ प्रतिशत पुर्याएको थियो। बिहीबार, अमेरिकाले चीनमा १४५५ प्रतिशत कर लगाउने घोषणा गर्यो।
विश्व व्यापार संगठनमा चीनको अर्को उजुरी
समाचार एजेन्सी रोयटर्सका अनुसार, अमेरिका र चीनबीचको कर युद्ध जारी रहँदा चीनले विश्व व्यापार संगठन (WTO) मा अमेरिकी करविरुद्ध थप उजुरी दर्ता गरेको छ।
यसअघि फेब्रुअरीमा अमेरिकी राष्ट्रपति ट्रम्पले चिनियाँ सामानहरूमा भन्सार शुल्क १० प्रतिशतले बढाउँदा चीनले पहिलो उजुरी दर्ता गरेको थियो। गत हप्ता चीनले WTO मा भन्सार शुल्कसम्बन्धी दोस्रो उजुरी दर्ता गर्यो।
कुनै पनि देशले अमेरिकी कर वृद्धिको सामना गरिरहेको अवस्थामा विश्व व्यापार संगठनमा उजुरी दर्ता गरी विवाद समाधान गर्न सक्छ।
विकासशील देशका लागि विनाशकारी
यसैबीच, संयुक्त राष्ट्रसंघले विकासशील देशहरूलाई कर युद्धको असरबारे चेतावनी दिएको छ। संघले यसको प्रभाव विनाशकारी हुनसक्ने बताएको हो।
संयुक्त राष्ट्रसंघीय व्यापार एजेन्सीका अनुसार, अमेरिकी राष्ट्रपति ट्रम्पले लगाएको करका कारण उत्पन्न आर्थिक अस्थिरताले विकासशील देशहरूमा ‘विनाशकारी’ प्रभाव पार्न सक्छ।
अन्तर्राष्ट्रिय व्यापार केन्द्रकी कार्यकारी निर्देशक पामेला कोक ह्यामिल्टनले भनिन्, ‘शुल्क लगाउनु विदेशी सहायता कटौती गर्नुभन्दा बढी हानिकारक हुन सक्छ।’
उनको भनाइ अनुसार, ‘यदि चीन र अमेरिका बीचको यो तनाव जारी रह्यो भने, यसले दुई देशबीचको व्यापारमा ८० प्रतिशतले गिरावट ल्याउन सक्छ, जसको असर विश्वव्यापी हुनेछ।’
उनले थप भनिन् कि विकासशील देशहरूले पछिल्ला वर्षहरूमा गरेको आर्थिक प्रगति यसले उल्टाउन सक्छ।
