लिबिया, ६ वैशाख । लिबियामा अझैपनि बारुदी सुरुङ र विस्फोटक वस्तुहरूको जोखिम कायमै रहेकाले त्यसको हटाउने कामलाई तीव्र पार्नु र जनतालाई सचेत पार्नु अत्यावश्यक रहेको राष्ट्रसंघका एक वरिष्ठ अधिकारीले बताएका छन् ।
‘बारुदी सुरुङ सचेतना अन्तर्राष्ट्रिय दिवस’ को अवसरमा त्रिपोलीमा आयोजित कार्यक्रममा बोल्दै राष्ट्रसंघ महासचिवका उप-विशेष प्रतिनिधि तथा मानवीय समन्वयकर्ता ऐनियास चुमाले बारुदी सुरुङबाट हुने जोखिमको दीर्घकालीन असरबारे चिन्ता व्यक्त गरे ।
उनले भने, “लिबियाको सुरक्षाका लागि बारुदी सुरुङ हटाउने कार्यलाई प्राथमिकता दिनैपर्छ, साथै जनतालाई यसको बारेमा सशक्त जानकारी दिनुपर्छ ।”
लिबियाली बारुदी सुरुङ केन्द्रका अनुसार देशका धेरै भूभाग अहिले पनि जोखिमपूर्ण छन्, र नयाँ जोखिम क्षेत्रहरू पनि थप पहिचान भइरहेका छन्। केन्द्रका प्रमुख खलील एल-शिब्लीले लिबियाली टोलीहरूको प्रयास सफल बनाउन अन्तर्राष्ट्रिय सहयोग अपरिहार्य रहेको बताए ।
त्यस्तै, राष्ट्रसंघ अन्तर्गत बारुदी सुरुङ विभाग प्रमुख फात्मा जौरीगले कानुनी संरचना, योजनाबद्धता र समन्वय सुदृढ गर्न सबै सरोकारवालाबीच सहकार्य आवश्यक रहेकोमा जोड दिइन् ।
सन् २०११ मा मुहम्मर गद्दाफीको शासनको अन्त्यपछि सुरु भएको द्वन्द्वका कारण लिबियाको थुप्रै भूभाग विस्फोटक पदार्थले प्रदूषित भएका छन्। त्यसका कारण सर्वसाधारणको जीवन अझै पनि असुरक्षित बनेको छ । एजेन्सी
