सर्लाही,०६ चैत । राज्यको नीति अनुसार सहज, सरल र छिटोछरितो सेवा प्रवाह गर्ने भनिए पनि मलंगवास्थित जिल्ला प्रशासन कार्यालय सर्लाहीमा नागरिकताको प्रतिलिपि बनाउनका लागि अत्यधिक समय लाग्ने सेवाग्राहीहरूले गुनासो गरेका छन् ।
मलंगवाबाट पश्चिम र पूर्वका विभिन्न स्थानीय तहका नागरिकहरू नागरिकताको प्रतिलिपिका लागि कार्यालय धाउँदा कम्तीमा १५ देखि २० दिनसम्म पर्खनुपर्ने बाध्यता रहेको सेवाग्राहीहरूले जनाएका हुन् ।
सामाजिक सञ्जालमार्फत आफ्नो पीडा सार्वजनिक गर्दै स्थानीय उदयकान्त मिश्रले लेखेका छन्, “यो दृश्य जिल्ला प्रशासन कार्यालय सर्लाहीको हो । २०५८/०५९ सालमा माओवादी द्वन्द्वका क्रममा माओवादीले आगजनी गरी सरकारी कागजातहरू नष्ट गरेपछि आजसम्म आम जनताले ठूलो दुख बेहोर्दै आएका छन् ।”
उनले थप्दै भनेका छन्, “त्यस समयमा कागजात नष्ट भएपछि हरिवन र बरहथवा इलाका प्रशासन कार्यालयहरूबाट सहज रूपमा सेवा प्रवाह भइरहेको देखिए पनि दक्षिणी भेगका पालिकाका नागरिकहरूले मलंगवामा प्रतिलिपि बनाउन जाँदा अनावश्यक रूपमा दिनहुँ कार्यालय धाउनुपर्ने र १५ देखि २० दिन कुर्नुपर्ने बाध्यता छ ।”
मिश्रले इलाका प्रशासन कार्यालयहरू विस्तार गरी पश्चिममा बलरा र पूर्वमा हरिपूर्वामा प्रशासनिक सेवा केन्द्र स्थापनाको आवश्यकता रहेको समेत औँल्याएका छन् ।
यस सम्बन्धमा प्रमुख जिल्ला अधिकारी तुलसीबहादुर श्रेष्ठसँग सम्पर्क गर्न खोज्दा उनको फोन उठेन ।
