काठमाडौं,१२ वैशाख । भारत–पाकिस्तान सीमा क्षेत्र फेरि एकपटक तनावग्रस्त बनेको छ। कश्मीरको नियन्त्रण रेखा (एलओसी) मा भारतीय र पाकिस्तानी सुरक्षाफौजबीच बिहीबार राति गोली हानाहान भएको हो।
एसोसिएटेड प्रेसले तीन जना भारतीय सेनाका अधिकारीलाई उद्धृत गर्दै दिएको जानकारीअनुसार पाकिस्तानी सुरक्षाकर्मीहरूले कश्मीरमा रहेको भारतीय चेकपोस्टमा साना हतियारबाट अन्धाधुन्ध गोली प्रहार गरेका थिए। जवाफस्वरूप भारतीय सेनाले पनि आक्रमणस्थलतिर गोली चलाएको जनाइएको छ।
अलजजिराले पनि भारत–पाकिस्तानबीच एलओसीमा गोली हानाहान भएको पुष्टि गर्दै घटनापछि सीमा क्षेत्रमा तनाव चुलिएको उल्लेख गरेको छ। घटनाबारे पाकिस्तान सरकारले भने औपचारिक प्रतिक्रिया दिएको छैन।
पाकिस्तानी विदेश मन्त्रालयका प्रवक्ता शफकत अली खानले पत्रकार सम्मेलनमा भने, “हामी सेनाको औपचारिक पुष्टि नभएसम्म यसबारे केही टिप्पणी गर्न चाहन्नौं।”
गोली हानाहानको यो घटना भारतको जम्मु–कश्मीरस्थित बैसरन उपत्यकामा मंगलबार भएको आतंकवादी आक्रमणपछि सार्वजनिक भएको हो। ‘मिनी स्विट्जरल्यान्ड’का रूपमा परिचित सो उपत्यकामा भएको उक्त आक्रमणमा बुटवलका सुदीप न्यौपानेसहित २७ जनाको ज्यान गएको थियो भने १७ जना घाइते भएका थिए। भारतीय सञ्चारमाध्यमका अनुसार आक्रमणमा पर्यटकमाथि लक्षित गरिएको थियो, जुन विगतका घटनाहरूको तुलनामा दुर्लभ मानिन्छ।
आक्रमणको जिम्मेवारी पाकिस्तानमा प्रतिबन्धित रहेको आतंकी समूह **लश्कर–ए–तैयबा (एलईटी)**को छायाँ संगठन रेजिस्टेन्स फ्रन्ट (टीआरएफ)ले लिएको छ। भारतले आक्रमणपछि पाकिस्तानमाथि सीमापार आतंकवादलाई समर्थन गरेको आरोप लगाउँदै कूटनीतिक प्रतिक्रिया दिइसकेको छ। इस्लामाबादमा रहेको भारतीय उच्चायोगमार्फत विरोध पत्र बुझाइसकेको भारतले पाकिस्तानसँगको सम्बन्ध समेत घटाउने संकेत दिएको छ।
हिन्दुस्तान टाइम्सका अनुसार पाकिस्तानका रक्षा मन्त्री ख्वाजा आसिफले एक टेलिभिजन अन्तर्वार्तामा भनेका छन्, “भारतले चालेका हालका कदमहरूले दुई देशबीच युद्धको अवस्था निम्त्याउन सक्छ।”
जम्मु–कश्मीरमा पछिल्ला वर्षमा आतंकवादी गतिविधिमा केही कमी आए पनि हालैको आक्रमणले शान्तिप्रक्रियामा प्रश्न उठाएको छ। तीन दशकभन्दा बढी समयदेखि संघर्ष जारी रहेको यो क्षेत्रमा पर्यटकमाथि लक्षित यति ठूलो हमला पहिलोपटक भएको हो।
दुवै मुलुकका प्रधानमन्त्रीहरूले सार्वजनिक रूपमा आ–आफ्नो धारणा नदिए पनि पछिल्ला घटनाक्रमले दक्षिण एशियाली क्षेत्रमै अस्थिरता थप्न सक्ने संकेत देखिएको विश्लेषकहरूको भनाइ छ।
