काठमाडौं,२२ वैशाख । अमेरिकी राष्ट्रपति डोनाल्ड ट्रम्पले सामाजिक सञ्जालमा पोपको रूपमा आफ्नो एआई (कृत्रिम बुद्धिमत्ता) द्वारा बनाइएको तस्बिर सेयर गरेपछि क्याथोलिक समुदायबाट तीव्र आलोचना आएको छ।
ट्रम्पले उक्त तस्बिर आफ्नै इन्स्टाग्राममार्फत सार्वजनिक गरेका थिए, जसमा उनी सेतो पोपको पोशाक र टोपीमा, घाँटीमा ठुलो क्रससहित गम्भीर मुद्रामा औँला उठाउँदै देखिन्छन्। यो तस्बिर क्याथोलिकहरूले पोप फ्रान्सिसको निधनमा शोक मनाइरहेका बेला, अप्रिल २१ मा सार्वजनिक गरिएको हो।
न्यूयोर्क राज्य क्याथोलिक सम्मेलनले ट्रम्पको यो कदमलाई “विश्वासप्रति अपमानजनक व्यवहार” भन्दै आपत्ति जनाएको छ। सम्मेलनको भनाइ छ, “हामीले भर्खरै आफ्ना प्रिय पोपलाई अन्तिम श्रद्धाञ्जली दिएका छौं। यस्तो गम्भीर समयमा यस्तो मजाक सह्य छैन।”
केही दिनअघि ट्रम्पले “म पोप बन्न चाहन्छु” भन्ने अभिव्यक्ति दिएका थिए, जुन अहिलेको परिस्थितिमा झनै विवादास्पद बनेको छ।
यद्यपि भ्याटिकनले ट्रम्पको तस्बिरप्रति हालसम्म कुनै आधिकारिक टिप्पणी दिएको छैन। पोपको निधनपश्चात् नयाँ उत्तराधिकारी चयनको प्रक्रिया बुधबारदेखि भ्याटिकनमा सुरु हुँदैछ।
ट्रम्प यस्ता धार्मिक विवादमा मुछिने पहिलो राष्ट्रपति भने होइनन्। अघिल्लो वर्ष राष्ट्रपति जो बाइडेन पनि गर्भपतनको समर्थनमा गरिएको र्यालीमा क्रसको प्रतीक प्रयोग गरेपछि आलोचित भएका थिए।
