काठमाडौं,०२ जेठ । अमेरिकी पूर्वराष्ट्रपति डोनाल्ड ट्रम्पले इरानसँगको आणविक कार्यक्रमसम्बन्धी वार्ता सकारात्मक दिशामा अगाडि बढेको बताएका छन्। आइतबार सम्पन्न दुई देशबीचको पछिल्लो वार्तालाई ट्रम्पले “दीर्घकालीन शान्तिका लागि अत्यन्त गम्भीर प्रयास” भन्दै मूल्यांकन गरेका हुन्।
बीबीसीले जनाएअनुसार, इरानले प्रतिबन्ध हटाउने सर्तमा आफ्नो आणविक कार्यक्रम सीमित गर्न इच्छुक देखिएको छ। इरानी सर्वोच्च नेताका एक सल्लाहकारले एनबीसी न्यूजसँग कुरा गर्दै यस्तो संकेत दिएका हुन्।
अमेरिका युरेनियम सम्वर्द्धन बन्द गर्न इरानमाथि दबाव दिइरहेको छ, जसको उद्देश्य इरानलाई आणविक हतियार विकास गर्नबाट रोक्नु हो। तर तेहरानले भने आफ्नो कार्यक्रम पूर्णतः शान्तिपूर्ण भएको दाबी गर्दै आएको छ।
ट्रम्प हाल खाडी मुलुकहरूको भ्रमणमा छन् र दोहा, कतारमा व्यापारिक नेताहरूसँग बोल्दै उनले भने, “यदि यो सम्झौता टुंगिन्छ भने इरानमा सम्भावित सैन्य कारबाहीको विकल्प आवश्यक नपर्न सक्छ।”
याद रहोस्, ट्रम्पले सन् २०१८ मा अमेरिका इरान आणविक सम्झौता (JCPOA) बाट एकतर्फी रूपमा बाहिरिएको घोषणा गरेका थिए। त्यसपछि द्विपक्षीय सम्बन्धमा चिसोपन बढेको थियो। उनले यसअघि अप्रिलमा सुरु भएको नयाँ वार्ता असफल भएमा इरानको आणविक साइटहरूमा सैन्य कारबाहीको चेतावनीसमेत दिएका थिए।
अहिले भने एक वरिष्ठ अमेरिकी अधिकारीले “प्राविधिक तहमा काम जारी राख्दै वार्ता अझ सशक्त बनाउने सहमति भएको” बताएका छन्।
