काठमाडौं,२८ जेठ । अमेरिका र चीनबीच महिनौंसम्म आयातकर सम्बन्धी विवाद चलिरहेकोमा दुई देशका शीर्ष अधिकारीहरूले व्यापारका विषयमा सुमधुर रूपमा अघि बढ्नका लागि एउटा फ्रेमवर्कमा सम्झौता भएको मंगलवार घोषणा गरेका छन् ।
लन्डनको ल्यान्कास्टर हाउसमा लगभग २० घन्टा चलेको वार्तापछि बोल्दै अमेरिकाका वाणिज्यमन्त्री हावर्ड लुटनिकले त्यसको जानकारी दिएका हुन् ।
‘हामीले जेनेभा सहमतिलाई कार्यान्वयन गर्ने फ्रेमवर्क बनाएका छौं,’ उनले बताए । जेनेभा सहमतिमा दुवै पक्षले चर्को आयातकरलाई ९० दिनसम्म स्थगित गर्ने प्रतिबद्धता गरेका थिए । लुटनिकले दुर्लभ पदार्थको निर्यातमा रहेको विवाद पनि समाधान हुने आशा व्यक्त गरे । आधुनिक विद्युतीय उपकरणहरूमा उपयोग हुने दुर्लभ पदार्थका लागि चीन संसारको सबभन्दा ठूलो निर्यातक हो । विद्युतीय वाहनदेखि लिएर हतियार प्रणालीसम्ममा यसको उपयोग हुन्छ ।
बेइजिङले गत अप्रिल महिनामा यसको निर्यातमा बन्देज लगाएपछि संसारभरि चिन्ता व्यक्त गरिएको हो । दुवै देशका राष्ट्रपतिले नयाँ फ्रेमवर्कलाई स्वीकृति दिएपछि यस विषयमा समाधान निस्कने लुटनिकले बताए । दुई देशका प्रतिनिधिबीच थप बैठकको सम्भावना नरहेको अमेरिकाका व्यापार प्रतिनिधि जेमीसन ग्रीयरले पुष्टि गरे । तर दुई देशबीच सम्पर्क कायम रहने उनको भनाइ छ । चिनियाँहरूसँग सम्पर्क राख्ने विषयमा आफू सकारात्मक रहेको उनले बताए ।
चीनका प्रमुख सम्झौताकर्ता ली चङगाङले दुवै देशका प्रतिनिधिले आआफ्ना राष्ट्रपतिलाई व्यापार सम्बन्धका विषयमा प्रस्ताव लैजाने जानकारी दिए ।
गत मे महिनामा स्विटजरल्यान्डको जेनेभामा भएका छलफलमा दुई देशले आयातकर घटाउने विषयमा सहमति जनाएका थिए । तर अमेरिकाले सेमीकन्डक्टर प्रविधिमा चीनको पहुँच रोकेको र चीनले दुर्लभ पदार्थ निर्यातमा बन्देज लगाएकोले तनाव कायम छ । चिनियाँ बजार अमेरिकी उत्पादनका लागि खोलिनुपर्ने अमेरिकाका राष्ट्रपति डोनल्ड ट्रम्पको भनाइ छ ।
