बीरगन्ज,२७ असाेज । स्वर्गीय रामबहादुर श्रेष्ठको स्मृतिमा जारी “ठोरी गोल्ड कप” फुटबल प्रतियोगिताको क्वार्टरफाइनल चरणमा वीरगञ्ज युनाइटेड फुटबल क्लबले शानदार जित दर्ता गरेको छ । आज सम्पन्न दोस्रो क्वार्टरफाइनलमा वीरगञ्ज युनाइटेडले एभरेस्ट फुटबल एकेडेमी, सर्लाहीलाई १–० गोलले पराजित गर्दै सेमिफाइनलमा स्थान सुरक्षित गरेको हो ।
प्रतिस्पर्धात्मक खेल प्रतिभा युवा क्लबका अध्यक्ष गोपा श्रेष्ठको अध्यक्षतामा सम्पन्न भएको थियो । कार्यक्रममा जगरनाथपुर गाउँपालिका अध्यक्ष तथा नेपाली कांग्रेस पर्सा क्षेत्र नं. ४ का सभापति श्रीकान्त यादव प्रमुख अतिथि रहनुभएको थियो ।
आजको खेल निकै रोमाञ्चक बनेको थियो । दुबै टिमले उत्कृष्ट प्रदर्शन गरे पनि वीरगञ्ज युनाइटेडले निर्णायक क्षणमा अवसरलाई गोलमा परिणत गर्न सफल भयो । आयोजक समितिका अनुसार, प्रतियोगिता हेर्नका लागि दस हजारभन्दा बढी दर्शकहरूको उपस्थिती रहेको अनुमान गरिएको छ, जसले ठोरी रंगशालालाई उत्साहमय वातावरण बनाएको थियो ।
यो जितसँगै बीरगन्ज युनाइटेडले उपाधितर्फको यात्रा थप मजबुत बनाएको छ । आयोजकले प्रतियोगिताको आगामी खेल तालिका भोलि सार्वजनिक गर्ने जनाएको छ ।
