१५ कात्तिक, काठमाडौं । आईसीसी विश्व क्रिकेट लिग–२ अन्तर्गत यूएईमा जारी एकदिवसीय शृंखलामा नेपालले आज अमेरिकासँग तेस्रो खेल खेल्दैछ। खेल दुबईस्थित आईसीसी एकेडेमीमा नेपाली समय अनुसार विहान सवा ११ बजेदेखि सुरु हुनेछ।
नेपालले यसअघि खेलेका दुवै खेलमा पराजय बेहोरेको छ। पहिलो खेलमै नेपालले यही अमेरिका विरुद्ध १०६ रनको लज्जास्पद हार व्यहोरेको थियो भने दोस्रो खेलमा यूएईसँग ५ विकेटले पराजित भएको थियो।
अब शृंखला जोगाउन नेपाललाई बाँकी दुवै खेल जित्नु अनिवार्यजस्तै बनेको छ। कप्तान रोहित पौडेल नेतृत्वको टोलीले आजको खेलमा पहिलो जितका लागि आक्रामक रणनीति अपनाउने तयारी गरेको बताइएको छ।
अर्कातर्फ, अमेरिका उत्कृष्ट फर्ममा छ। उसले नेपाल र यूएई दुवैलाई पराजित गर्दै लिग–२ को शीर्ष स्थानमा आफ्नो पकड बलियो बनाएको छ।हालसम्मको अंकतालिकाअनुसार अमेरिकाले २२ खेलमा ३२ अंक जोडेको छ भने नेपालले १८ खेलमा जम्मा १२ अंक हासिल गर्दै सातौं स्थानमा सीमित छ।
आजको खेल नेपालका लागि केवल जित होइन, लिग–२ मा पुनः प्रतिस्पर्धी बन्ने अवसर पनि हो। क्रिकेट विश्लेषकहरूका अनुसार नेपालले अमेरिकाविरुद्ध प्रारम्भिक विकेट चाँडै लिनु र मध्यक्रम सुदृढ गर्नु पर्ने छ भने ब्याटिङमा स्थायित्व देखाउन सके जितको सम्भावना जिवित रहन्छ।
