काठमाडाै,०२ फागुन । सन् १९९३ मा १० वर्षका एक मलेसियाली बालकले करिब १५०० नेपाली रुपैयाँमा किनेको AI.com डोमेन अहिले इतिहासकै सबैभन्दा महँगो मूल्यमा बिक्री भएको छ। यस डोमेनलाई ७० मिलियन अमेरिकी डलर (९ अर्ब रुपैयाँभन्दा बढी) मा बेचिएको छ, जसले इन्टरनेट जगतमा नयाँ कीर्तिमान कायम गरेको छ।
डोमेनको नयाँ मालिक क्रिस मार्सजलेक, विश्व प्रसिद्ध क्रिप्टो प्लेटफर्म Crypto.com का सह-संस्थापक र CEO हुन्। उनी यस डोमेनलाई नयाँ AI प्लेटफर्म सुरु गर्न प्रयोग गर्ने योजना बनाइरहेका छन्। यस प्लेटफर्ममार्फत प्रयोगकर्ताहरूले छिटो र सजिलै आफ्नै एआई एजेन्ट बनाउन सक्नेछन्, जसले मेसेज पठाउने, एप्सबीच अन्तरक्रिया गर्ने र स्टक ट्रेडिङमा सहयोग गर्ने काम गर्न सक्षम हुनेछ।
AI.com जस्ता दुई अक्षरका डोमेनहरू सामान्यतया बिक्रीका लागि सहज उपलब्ध हुँदैनन् र लोकप्रिय प्रविधिसँग जोडिएका हुँदा अत्यन्त मूल्यवान हुने गर्दछन्। क्रिस मार्सजलेकको योजना केवल डोमेन होल्ड गर्नु मात्र होइन, यसलाई उपभोक्तामुखी एआई प्लेटफर्मको आधार बनाउने छ।
क्रिप्टो डटकमको शुरुवात सन् २०१६ मा Monaco.com बाट भएको थियो, पछि यसलाई Crypto.com मा परिवर्तन गरिएको हो। कम्पनीले अहिले विश्वभर लाखौँ प्रयोगकर्तालाई ट्रेडिङ, वालेट, मार्केटप्लेस र भुक्तानी सेवाहरू प्रदान गर्दै आएको छ।
AI.com को बिक्रीले केवल डोमेन बजारमा मात्र होइन, एआई र क्रिप्टो उद्योगमा पनि हलचल मच्चाएको छ।
