काठमाडौँ,०४ फागुन । युक्रेनका पूर्वऊर्जामन्त्री हर्मन हलुश्चेन्को देश छोड्ने प्रयासका क्रममा पक्राउ परेका छन्। ५२ वर्षीय हलुश्चेन्को रेलमार्गबाट सीमाभित्रै पक्राउ परेका हुन्, तर उनी कुन देशतर्फ जान खोज्दै थिए भन्ने कुरा खुलाइएको छैन।
युक्रेनको केन्द्रीय भ्रष्टाचार विरोधी निकाय नाबु ले ‘मिडास’ काण्डको एक हिस्साको रूपमा उनलाई पक्राउ गरिएको जनाएको छ। यो काण्डमा गत नोभेम्बरमा १० करोड अमेरिकी डलर बराबरको हिनामिनाको आरोप लागेको थियो, र हलुश्चेन्को उक्त भ्रष्टाचारमा संलग्न सरकारी व्यक्तित्वहरूमध्ये एक थिए।
उनमाथि युक्रेनको ऊर्जा क्षेत्रको राष्ट्रिय परमाणु अपरेटर एनर्होएटमसँग सम्बन्धित ठेकेदारबाट सम्झौता मूल्यको १०–१५ प्रतिशत घुस सङ्कलन गरेको आरोप छ। तीन वर्षसम्म ऊर्जामन्त्री रहेका हलुश्चेन्कोलाई थप अनुसन्धानका लागि राजधानी किभ लगिएको छ।
राष्ट्रपति भोलोदिमिर जेलेन्स्की को प्रशासनमा भ्रष्टाचार उन्मूलनको प्रयासलाई यो मुद्दाले चुनौती दिएको छ।
