महोत्तरी,१५ फागुन । नेपाल कम्युनिस्ट पार्टी (नेकपा) ले महोत्तरी क्षेत्र नम्बर १ बाट दुईपटक निर्वाचित भइसकेका र पूर्वमन्त्री गिरिराजमणि पोखरेल लाई यसपटक पनि उम्मेदवार बनाएको छ।
२०१५ साल फागुन २४ मा खोटाङको खार्पामा जन्मिएका पोखरेल महोत्तरी, बर्दिवास–३ का स्थायी बासिन्दा हुन्। उनी २०३२ सालदेखि ‘राल्फा’ आन्दोलनको प्रभावमा विद्यार्थी राजनीतिमा सक्रिय भएका थिए। वाणिज्यशास्त्रमा स्नातकोत्तर र कानुनमा स्नातक शिक्षा हासिल गरेका पोखरेलले २०३७ सालदेखि पूर्णकालीन राजनीतिमा सक्रियता सुरु गरेका थिए।
राजनीतिक यात्रा
पोखरेल अनेरास्ववियुको केन्द्रीय सदस्य हुँदै २०४१ र २०४३ सालमा दुई कार्यकालसम्म केन्द्रीय अध्यक्ष बने। २०४३ सालको चौथो महाधिवेशनबाट नेपाल कम्युनिस्ट पार्टीको केन्द्रीय सदस्य भएका उनी पछि जनमोर्चा नेपालको केन्द्रीय सचिवालय सदस्य र उपाध्यक्ष हुँदै हाल नेकपाको पदाधिकारी तहमा क्रियाशील छन्।
संसदीय अनुभव
पोखरेलको संसदीय यात्रा २०६४ सालको पहिलो संविधानसभा निर्वाचनबाट सुरु भयो। महोत्तरी–१ बाट विजयी बनेका उनले २०७४ को प्रतिनिधिसभा निर्वाचनमा पनि सोही क्षेत्रबाट विजय हासिल गरे। २०७९ को निर्वाचनमा भने उनी एमालेका लक्ष्मी महतो कोइरीसँग पराजित भए।
मन्त्रीको रूपमा योगदान
तीनपटक स्वास्थ्य मन्त्री र एकपटक शिक्षा, विज्ञान तथा प्रविधि मन्त्री बनेका पोखरेलले स्वास्थ्य बीमा कार्यान्वयन र विपन्नका लागि निःशुल्क उपचार सेवा विस्तारमा उल्लेखनीय भूमिका खेले। शिक्षा मन्त्रीका रूपमा उनले प्राविधिक शिक्षा विस्तार र विद्यार्थी भर्ना अभियानलाई तीव्रता दिए।
विवाद र चुनौती
राजनीतिक यात्रामा पोखरेलले धेरै पटक जेल र हिरासत भोगेका छन्। डा। गोविन्द केसीका माग सम्बोधन र प्राविधिक शिक्षालय (सीटीईभीटी) सम्बन्धी विवादका कारण उनी आलोचनाको केन्द्रमा पनि परेका थिए।
