काठमाडौं,०९ जेठ । भारतीय प्रधानमन्त्री नरेन्द्र मोदीलाई अमेरिकी राष्ट्रपति डोनाल्ड ट्रम्पको तर्फबाट अमेरिका भ्रमणको औपचारिक निम्तो दिइएको छ। भारतका लागि अमेरिकी राजदूत सर्जियो गोरले सामाजिक सञ्जालमार्फत जानकारी दिँदै अमेरिकी विदेशमन्त्री मार्को रुबियोसँग प्रधानमन्त्री मोदीको भेटवार्ता सकारात्मक र महत्वपूर्ण भएको बताएका हुन्।
उनका अनुसार भेटका क्रममा सुरक्षा, व्यापार तथा महत्वपूर्ण प्रविधिजस्ता क्षेत्रमा भारत–अमेरिका सहकार्यलाई अझ सुदृढ बनाउने विषयमा छलफल भएको थियो। उनले भारतलाई अमेरिकाको महत्वपूर्ण रणनीतिक साझेदारका रूपमा उल्लेख गरेका छन्।
सर्जियो गोरले अर्को पोस्टमा अमेरिकी विदेशमन्त्री रुबियोले राष्ट्रपति ट्रम्पको तर्फबाट प्रधानमन्त्री मोदीलाई ह्वाइट हाउस भ्रमणका लागि आधिकारिक निमन्त्रणा दिएको जानकारी पनि दिएका छन्। यसैबीच प्रधानमन्त्री मोदीले पनि सामाजिक सञ्जालमार्फत अमेरिकी विदेशमन्त्री मार्को रुबियोलाई स्वागत गर्न पाउँदा खुशी लागेको बताएका छन्।
मोदीका अनुसार भेटवार्तामा भारत–अमेरिका रणनीतिक साझेदारी, विश्वव्यापी शान्ति र सुरक्षासँग सम्बन्धित विषयमा विस्तृत छलफल भएको थियो। उनले विश्वव्यापी हितका लागि भारत र अमेरिका मिलेर काम गर्दै जाने प्रतिबद्धता समेत व्यक्त गरेका छन्।
