काठमाडौँ,०३ चैत । पूर्वमन्त्री राजकुमार गुप्ता र रञ्जिता श्रेष्ठ विरुद्धको भ्रष्टाचार सम्बन्धी मुद्दाको सुनुवाइ स्थगित भएको छ। मुद्दा कास्कीको लिचिबारी घुस प्रकरणसँग जोडिएको छ। विशेष अदालतले पुर्पक्षका लागि गुप्तालाई थुनामा पठाउने आदेश दिएपछि उनले सर्वोच्च अदालतमा निवेदन दिएका थिए।
गुप्ताको निवेदनको सुनुवाइ मंगलबार सर्वोच्च अदालतका न्यायाधीश हरिप्रसाद फुयाँल र श्रीकान्त पौडेलको संयुक्त इजलासमा पेसी तोकिएको थियो। तर, गुप्ताका कानुन व्यवसायीले सुनुवाइ स्थगित गरेपछि लिचिबारी घुस प्रकरणसँग सम्बन्धित अन्य दुई मुद्दा पनि स्थगित भएको हो।
यससँगै पूर्वमन्त्री रञ्जिता श्रेष्ठ र तत्कालीन मालपोत कार्यालय कास्कीका प्रमुख रामचन्द्र अधिकारी विरुद्धको भ्रष्टाचार मुद्दा पनि सुनुवाइको लागि स्थगित भएको छ। विशेष अदालतले श्रेष्ठ र अधिकारीलाई धरौटीमा छाड्ने आदेश दिएको थियो। अख्तियार दुरुपयोग अनुसन्धान आयोगले उक्त आदेश बदर गर्न माग गर्दै सर्वोच्च अदालत पुगेको थियो।
यसअघि अदालतले गुप्ताको निवेदनमा कैफियत प्रतिवेदन माग गर्दै थप अनुसन्धानको आदेश दिएको थियो। लिचिबारी प्रकरणमा विशेष अदालतका अध्यक्ष सुदर्शनदेव भट्ट र न्यायाधीशहरू डिल्लीरत्न श्रेष्ठ र विदुर कोइरालाको इजलासले गुप्तालाई थुनामा पठाउने आदेश जारी गरेको थियो।
अख्तियारको आरोप अनुसार गुप्ताले मालपोत कार्यालयका प्रमुख अधिकारीको सरुवा रोक्न र भूमि आयोगमा सदस्य बनाइदिने भन्दै घरजग्गा व्यवसायीबाट ५३ लाख रुपैयाँ घुस लिएका थिए। गुप्ता र रञ्जिता श्रेष्ठले पदको दुरुपयोग गर्दै कार्य सुविधा प्रदान गरेको आरोपमा २५ लाख रुपैयाँ घुस लिएको समेत दाबी गरिएको छ।
गुप्ताले अदालतमा आफूमाथि लागेको आरोप झुटो भएको र कसैसँग घुस नलिएको दाबी गरेका थिए, तर अदालतले तत्काल प्राप्त प्रमाणका आधारमा उनलाई निर्दोष मान्न नसकिने ठहर गरेको छ।
