काठमाडौँ, १३ बैशाख — विश्व सूचीमा रहेका नेपालका विनोद चौधरीको श्रीलंकामा रहेको पाँचतारे होटल ताज समुन्द्र आत्मघाती बम बिस्फोटबाट मुस्किलले जोगिएको छ ।
आइतबार अन्तर्रा्ष्ट्रिय आतकंकारी संस्था इस्लामिक स्टेट (आइएस) ले राजधानी कोलम्बोमा गरेको श्रृंखलाबद्ध आत्मघाती बम हमलाबाट चौधरीको होटल जोगिएको हो ।
प्रहरीका अनुसार आइएसको आत्मघाती बम हमलाको ‘टार्गेट’ उनको होटल पनि थियो । आइएसका एक आत्मघाती आक्रमणकारी बिस्फोटक सामाग्री झोलाभरी बोकेर होटलमा पुगेको श्रीलंकाका अधिकारीहरुलाई उदृत गर्दै न्यूयोर्क टाइम्सले जनाएको छ ।
ती आक्रमणकारीले दुई पटक बम पड्काउन खोजेको तर, प्राविधिक समस्याले नपड्किएको प्रहरीले जनाएको छ । त्यसपछि समुन्द्र किनारमा रहेको पाँच तारे होटलबाट निस्किएर आक्रमणकारी नजिकैको एउटा सानो होटेलमा पसेका थिए । त्यहीँ बम बिस्फोट भएर उनको मृत्यु भएको थियो ।
सानो होटलमा पसेर प्राविधिक समस्या सुल्झाउन खोज्दा खोज्दै बम पड्केको अनुमान प्रहरीले गरेको छ । ताज समुन्द्रमा बम पडकेको भए श्रीलंका आक्रमणमा मर्नेको संख्या अझ धेरै बढ्न सक्ने श्रीलंकन प्रहरीले जनाएको छ । समुन्द्री तटमा रहेको कोलम्वोको प्रख्यात ‘ताज समुन्द्र’ प्रायजसो विदेशी पर्यटकहरुको भरिभराउ हुने गर्छ ।
‘ताज समुन्द्र’ भारतको प्रसिद्ध ‘ताज समुह’ सँगको साझेदारीमा विदेशमा चौधरीले खोलेको पहिलो पाँचतारे होटल हो । अहिले चौधरी समूहले संसारभर कैयौं होटल र रिसोर्ट चेन संचालन गरिरहेको छ ।
यसअघि आक्रमणमा ३ सय ५९ जना मानिसको मृत्यु भएको भनिए पनि सरकारले पहिले भनिए भन्दा झण्डै १०० जना कम भएको जनाएको छ । श्रीलंकाको स्वास्थ्य मन्त्रालयले बम आक्रमणमा मर्नेको संख्या २५३ जना मात्र रहेको जनाएको छ ।
