ब्रुनाई, वैशाख २३ । ब्रुनाईमा समलिंगी यौन सम्बन्धमा रहेकालाई ढुंगाले हानेर मृत्युदण्ड दिने कानुन लागू नहुने भएको छ ।
गत अप्रिलमा ब्रुनाईमा समलिंगी यौन सम्बन्ध रहेको पत्ता लागेमा ढुंगाले हानेर मृत्युदण्ड दिने कानुन बनाइएको थियो । यसबारेमा अधिकारकर्मी तथा अन्तर्राष्ट्रिय जगतमा चर्को आलोचना भएपछि ब्रुनाईका सुल्तान हसनल बोल्कीहाले टेलिभिजनबाट देशवासीका नाममा सम्बोधन गर्दै देशमा समलिंगी सम्बन्धमा कसैलाई मृत्युदण्ड नदिने बताएका हुन् ।
यद्यपि ब्रुनाइमा सन् १९५७ देखि विद्यमान कानुनमा कतिपय विषयलाई लिएर मृत्युदण्डको व्यवस्था छ । यसका साथै गएको अप्रिलदेखि लागू भएको नयाँ कानुनमा चोरीको आरोप साबित भएपछि दोषीको हात अथवा खुट्टा शरीरबाट अलग गरिने कडा कानुन पनि ल्याइएको छ । ब्रुनाईमा मदिरा बेच्न पहिलेदेखि नै प्रतिबन्ध छ । (एजेन्सी)
