काठमाडौं, २४ वैशाख — महानगरीय प्रहरी अपराध महाशाखा काठमाडौंले पत्नी हत्या गर्ने एक व्यक्तिलाई काठमाडौंको बागबजारबाट पक्राउ गरेको छ ।
काभ्रे जिल्लाको भुम्लु गाउँपालिका वडा नम्बर ६ कोलाती स्थायी घर भई हाल काठमाडौंको बागबजारमा पत्नी निर्मला नेपालसँग डेरा गरी बस्ने पुष्कर भन्ने राजकुमार पहरीलाई प्रहरीले पक्राउ गरेको छ ।
२७ वर्षीय राजकुमार पहरी २३ वर्षीया पत्नी नेपालसँग बागबजारमा डेरा बस्दै आएका थिए । पत्नीसँग विवाद हुँदा पहरीले वैशाख २१ करीव साढे पाँच बजे पलंगमा ठोकेर पत्नी निर्मला नेपाललाई हत्या गरेको महानगरीय प्रहरी महाशाखा काठमाडौंका प्रमुख एसएसपी धिरज प्रताप सिंहले जानकारी दिनुभयो ।
भोजपुर जिल्लाको याङपाङ माइत भएकी निर्मला नेपालले पहरीसँग विवाह गरी बस्दै आएकी थिइन् ।
पत्नीको हत्या गरी पहरीले घटना लुकाएर राखेका थिए । पत्नीको मृत्यु भएको खबर उनले आफन्तलाई गराएका थिए । सूचना पाएपछि हत्या भएको स्थानमा पुगेको प्रहरीले पहरीसँग सोधपुछ गरेको थियो ।
पहरी आफूले पत्नीको हत्या गरेको स्वीकार गरेपछि नियन्त्रणमा लिएर अनुसन्धान शुरु भएको एसएसपी सिंहले बताए ।
