काठमाडौं। आगामी आर्थिक वर्ष २०७६/०७७ का लागि नेपाल विद्युत प्राधिकरणको बजेट १५ अर्ब रुपैयाँ मात्र हुने भएको छ। चालु आर्थिक वर्षको लागि भने प्राधिकरणलाई २५ अर्ब रुपैयाँ बजेट छुट्याइएको थियो।
चार वर्षभित्र देशभर विद्युतीकरण गर्ने महत्वकांक्षी लक्ष्य लिएको सरकारले लक्ष्य कार्यान्वयन गर्ने निकाय विद्युत प्राधिकरणलाईनै चालु वर्षको भन्दा १० अर्ब रुपैयाँ कम बजेट छुट्याएपछि प्राधिकरणले असन्तुष्टी जनाएको थियो।
अर्थमन्त्रालयले प्राधिकरणलाई बोलाएर चार वर्ष भित्र सबै नागरिकलाई विद्युत सेवा दिन छुट्टै कार्यक्रम ल्याउने भनेपछि प्राधिकरणको भागमा आउने आर्थिक वर्षमा १५ अर्ब रुपैयाँ मात्रै बजेट हुने प्राधिकरण स्रोतले बतायो।
प्राधिकरणसँग छलफल भएपछि सरकारले नीति तथा कार्यक्रममै उज्यालो अभियानलाई निरन्तरता दिदै ४ वर्षभित्र सबै नेपालीलाई स्वच्छ उर्जा दिने घोषणा गरिसकेको छ। उक्त कार्यक्रमको लागि सरकारले छुट्टै बजेट व्यवस्थापन गर्नेछ।
४५ अर्ब रुपैयाँ ऋण दिने
आगामी वर्षको बजेटमा सरकारले प्राधिकरणलाई आन्तरिक स्रोतबाट १५ अर्ब रुपैयाँ मात्र बजेट छुट्ट्याएपनि विदेशी ऋण भने ४५ अर्ब रुपैयाँ दिने तयारी गरेको स्रोतको भनाई छ।
प्राधिकरणले त्यस्तो सहुलियतपूर्ण ऋणलाई प्रसारणलाइन निर्माण र केही जलविद्युत आयोजनामा पनि लगानी गर्ने छ। आन्तरिक बजेटबाट भने प्राधिकरणले सवस्टेशन स्तरोन्नती, ग्रामीण तथा सामुदायिक विद्युतीकरणका कार्यक्रम खर्च गर्नेछ।
